Nagaland nung Covid vaccine tanabuba shilem agütsür

Kohima, March 1 (TYO): Hombar nungi Nagaland nung teintet rogotem aser tashidak alir arishi küm 45 ser temapur nem COVID vaccine agütsüba mapa tenzükogo.

“Tanü Dimapur, Kiphire, Longleng, Mokokchung, Mon, Phek, Tuensang aser Zunheboto district hospital tem den Naga Hospital Authority, Kohima, Urban Primary Health Centre, Wokha aser Jalukie Community Health Centre, Peren nung vaccine agütsüogo” ta State Immunization Officer Dr Ritu Thurr-i metetdaktsü.

“Arishi küm 60 ser temapurtem aser ano temang nung timtem alir arishi küm 45 ser temapur nem vaccine ya angati agütsür. March 7 nungi vaccine agütsüba mapa tuluba inyaktsü,” ta Dr Ritu Thurr-isa ashi.

Tanü arishi küm 60 ser temapur nisung 180 aser arishi küm 45 ser temapur nisung 45 nem vaccine agütsüogo. Tanü vaccine agirtem rongnung tambutisangji Longleng district nungi arishi küm 89 tain tambur ka liasü, ta paisa ashi.

Tanü tashi nung Nagaland nung Covid vaccine indang dose 35,789 agütsüogo. Parnok rongnung frontline workers 19,779 aser healthcare professionals 10,238 dena lir, ta Dr Thurr-isa metetdaktsü

Healthcare professionals nungi nisung 5,579-i tanabuba dose agiogo aser parnok nem vaccination certificate agütsüogo, ta State Immunization Officer-isa ashi.

“Tanü agütsürtem dena vaccine agir shinga dak-a temang nung timtem adokba osang mali,” ta paisa shisem.