Nagaland nung Cyclone Mora ajanga takoksa bener arutsü

Dimapur, May 31 (TYO): Nagaland nung tzünglu aser mopung tashii aonba ajanga tesem kar nung nisung taküm dena samaba osangtem angazüker.
May 31, 2017 nü District Disaster Management Authorities (DDMAs)-i osang sangoktsüba nung, Phek district kübok ajungben tzümetsüng arudang nisung pezü ponger aoba shia lir, ta Commissioner & Secretary to the Government of Nagaland, Khrienuo Metha-i sangdong ka nung metetdaktsü.
May 30, 2017 ayaterm 12:30 ako nungi 1:00 ako meta tzünglu kanga aruba agi tzümetsüng lendong atalok aser idangji Meluri yimtsüng o Jessami yimtsüng (Manipur) nung alu ponger ao. Idangji nisung pezü tzü agi ponger ao aser ka yiru.
District Administration, 22AR sepaitem, Akash Bridge nung mapa lemzüka aliba 111 BSF sepaitem, State Disaster Response Force, Meluri, Jessami aser temeket aliba yimtsüngtem nung nübotem adenshia nisung samartem bushitepdar, ta Khrienuo Metha-isa metetdaktsü.
Tzümetsüng ajanga Meluri sub- division kübok Phonkuri nung apu ana ponger ogo, ta paisa shisem.
Maneni, Mokokchung district nunga mopung tesashi aonba ajanga public utility service tem raksatsüba osang angazüker aser iba dak sendakba osang tejangja metetpeladar, ta paisa shisem.