Nagaland nung dennür mali asü ?

– S. T. Yapang. Lkr. Kohima.

Tawa Manipur assembly election agiba ajanga mapa agi Naga nunger sünür aser o agi temoatsü aginüdang Naga nunger sünür na jangjashiba mapang süogo. Ajidang masü Nagaland state ta tilaka jateter aliba nungia yiaki alirtemji yimdenren nung tajangzük aginüdang adianu amai züngshiba dangashi shitakba mapa agi dendaktsünüba mali ta puteter.
Khulitemji ya; March 11, 2017 anogo Manipur election sangdongba nung Naga nunger ta jembia aruba nübu aser Naga nunger ajungtsü tenzükba telok tenüng agi NPF nungi nisung pezü tashi adokba asenok ajaki metetogo, kasa Manipur nungjisa Tatar menden roker nungi BJP-21, Cong-28, NPF-4, NPP-4, LJP-1, AITC-1 aser IND-1 ta takok angu, yimden tashi abentsü asoshi nübu 31 nüngtaker, saka shingaia mengutet nungji tang amala telok tila nungi adoker ket nungji shir telok nem sorkar kümdaktsünür tashi lir, aser parnok nübu ishika dang süaka parnoki aginübatem ataloktsütsü ta shia mesüzüker aser yamaji inyaker, saka Naga nunger yimkong tia maka Naga nunger ajungtsü kecha mejembi odang NPF tatar pezü den NPF tanishirtem parnok tebilembaji Cong telok samatsütsü dang sentong jagi melen, kechiyong iba amala inyakyim nungjibo rongsen tzümetsüng amai nunga arutsü, saka Naga nunger ajungtsüsa jembi agibo yimden nung opposition dang asütsüsa akümtsü, asen lima election nung rongsen jenti lalur opposition-sa asütsüjia shibai aremtsü, saka yamaji kecha mesütettsübo tamasayongi Naga nunger ajungtsü aser alima ka nung külemi alitsüji mejembi tajungba.
Manipur Election nübuyim nung BJP aser Cong anapronglai Manipur artsü memelenshitsü ta ajangajanga shiogo, anungji item o ashir telok den Naga nunger ajungtsü tenzükba teloktemjibo madentsüba ato, saka tenüng agi temoatsü aginüdang Naga nunger sünür dangashi ochi agi Naga nunger sünüba melira tang amaisa ataloktsü.
Manipur nung yia alir denji putepa NPF tir aser Nagaland CM Dr. Shürozelie Liezietsu-i Manipur election osang sangdongli yongi “Northeast nungi Congress party agientsü asoshi tenangzükba nungi masetshir aser Manipur nung non-Congress teloktep mashi ka den NPF-i yariteptsü nangzüker” ta shia angutsü, iba melena “shir teloki Naga nunger ali ajak longjemer alima ka nung alitsü pelashiashia agizükdir par telokji pu asemtsü” ta sangoktsü asübo alima tatem tashi oa aliria Naga nunger taginüba aser temeten jangja metetla aser Manipur nung Govt. metentettsüsa tia ka ajurua PR arula, iba mapang shitak nung Naga yimden keno jembia telemtetba tajung ka agitsü lenmang sadema lapoker süla. Saka tangari yutsür ajentsü ang tsübuseta arishiba ya koda tejashitsü!.
Joko tangar bendanger, talisa anülulen alirtemibo Manipur nung yia alir Naga nungertemi Nagalimai ali bener adoka dennüba mesüra Nagaland state nung aliri arua dendaktsünüba khuli mangutsü, oda pei yimdaki mouteter rogo, aser pei tasoli nung sadema meliteti senzür ishika tejangraba dang mesüka tangaribo bilemtsü, aser aji agi yimden keno nunga tashi maittsü, kechiyong pei yimdak ali kimung ajak nüka saru moluk toka alir nübutemi Nagalimai ali bener adoka dennüba khuli mesayuteter, Manipur nunger den longjemer aotsü dang aritepba mapa ajaki nguogo, anungji o jembiba o mapa na meputeper.
Manipur nunga süang Assam mesüra Arunachal ano Myanmar amala nung alir ajaki tang aonpo nung inoka sorutsü mebilemi Naga nunger sünüba khuli tejangja sayutet asübo, ashiko Naga yimten keno asoshi mapa temelaba den tekaraba tembangla ta bilemer.
Aikati Nüchiso dak alema tanga telemtetba maginür, ajia pei taginüba balala asünungji tim dang, saka asenoki metettsükaji tang aliba state dang nungi jenjang tajungba ka danga ngutetra ajia junger, kechiyong kechi komaka asüyonga mesüra tezülutepba balala aika liaka telemtetba ka aliba jaki Nagalima balaka razüka moutettsü ta meshitettsü, aser ajibo meimchir sentong kija agi mataloktsü, saka Tsüngremer anogotong ka nung ataloktsü ta amanger, tatsütiba agi tang India ya China amala alima tulu ka den rara adok nung asen Nagalima ya asenoki India nungi pila mounüyonga parnoki meinzüka yutsütsü, kechiyong parnok asoshi asenok ya sang ka aser bonglang makaba ongken ka mesüka lir.
Ano külen Nagaland state telongzük nung alir kintem rongnungia anüdoklen alirbo parnok balaka razüka onüba ajaki meteta lir, anungji o agi bendentsü jembir, saka mapa agibo Nagaland nung dennür mali.
Nagaland tashi itdaktsütsü asoshi Naga nunger tenüng atemer mulungtet telok jenti tenzük, yangji Naga Hoho temaba ka sür tenzük, saka tangbo iba telongjem nung Nagaland state nung alir dangbo Manipur state nung alir ang timba, anungji Nagaland state dak sentakba keno Nagaland state sorkar mesüra nübur shingaia parnok den melemsateptsü aser parnok telok tebang maitdaktsütsü ozüng agütsütsüba sürnung per ngur nokbang atsü ama, parnoki inyaksaba makok süshia inyaker, saka kibur dangjibo kecha meshiteter ta Naga nunger timtem tia ka saka tebang o agibo tajung ta makmakshimakba tensa ka nung lir, yang nungi tongpoka aotsüji tasü aitsüba dak alaka tanga lenmang kangarabo mangur. Nagalima nunga dena alir anepalu mesüteter nung medennür kangshia dendaktsütsüjia tim masü nungji pei pei sasep nung ya dang mokteper ali tajungba ta mapa agi jungkai adoktsür.