Nagaland nung ‘disturbed area’ atsülanger

New Delhi, July 3 (Agencies): Armed Forces (Special Powers) Act kübok Nagaland ajunga “disturbed area” mapang atsülangogo.
“Nagaland ajungalen tensa majung aser lendong ataloktsü ana nungdang lir aser iba jagi armed forces-i civil power den yariteptsü nüngdak. Anungji, ita trok atema “disturbed area” alitsü mapang atsülanger,” ta home ministry sangdong ka nung metetdaktsü.
“Armed Forces (Special Powers) Act, 1958 nung Arrla 3 nung tashi agüja aliba ama, Centre sorkari Nagaland state ajungalen, June 30, 2017 nungi tenzüker ita trok atema ‘disturbed area’ alitsü sangdonger” ta Home ministry nung joint secretary, Satyendra Garg-i sangdong nung shia lir.
Nagaland nung nisung tepsetba, auyaba aser tashiyim agi sen saruba inyakyim lir aser iba jagi “disturbed area” alitsü mapang atsülanger, ta ketdangser kari ashi.
Northeast aser Jammu & Kashmir nungi teloktemi ashishitep aketba AFSPA ozüng agientsü atema takhangba agüja arur. Parnoki ashiba agi, iba ozüng ajanga sepaitemi civilian tem anema tashiyim mapa inyaker.
Nagaland nung AFSPA ya küm aika amshia arur. August 3, 2015 nü Prime Minister Narendra Modi lia, India sorkar atema interlocutor R N Ravi aser NSCN-IM general secretary Thuingaleng Muivah nati framework agreement nung sign asüba sülen-a AFSPA magien.
Nagaland nung küm aika rarayonga aruba sülen, 1997 nung mezüng ceasefire tenangzüktep agi aser iba sülen küm 18 tashi olemtep agiyonga arur framework agreement agi.