Nagaland nung ‘dyslexia’ agi timtemertem yaritsüla: Temjen Toy

Kohima, Yimpoksüi (November) 2 (TYO): Centre sorkari dyslexia agi tim atema tanurtem yaritsü atema inyakba mapa nung Nagaland-ia shilem agitsüla ta tanü Additional Chief Secretary, Temjen Toy-i ashi.
SCERT Nagaland-i “Mainstreaming of Children with Learning Disability in Education” indang anogo ka workshop ayongba sentong nung jembidang Temjen Toy-i iba tayongzükba agütsü.
SEIMAT Hall nung agiba sentong nung Department of School Education-ia teyari agütsü.
Nagaland ama state tila ka nung dyslexia agi timtemer kaketshir 20% shi lir ta asübaji onsara lir, ta Temjen Toy-i ashi.
Dyslexia ta asüba ya zünga aotsü nung timtem ajuruba mesüra o, zülujang aser tanga maitsütem mangatetba timtem dang ajar, saka iba ya tekolok nungbo mekongshir.
Centre-i iba timtem yaritsü indang mapa inyaker anungji Nagaland nunga dyslexia agi tim atemer kaketshir 20% yaritsü atema asenoki mapa inyakdi, ta Additional Chief Secretary-i ashi.
“Dyslexia agi tim atemer tanur aika tekolok majung mesüra tagidak mali ta bendanga amshir kechiyong parnoki parnok külempur memeneper. State sorkari iba timtem koktettsü atema kanga süoki ia bilemer saka iba wadang nung tesayurtemi sorkar len manira, alizüng ayuba metongtettsü” ta paisa shisem.
Tom Cruise, Salma Hayak aser Steve Jobs nunger ya dyslectic purtem liasü. Ajisüaka, parnoki taküm nung pei pei wadang balala nung jenjang tajung tongtet, kechiyong parnok nem tesayuba tajung agütsü aser mapang shitak nung parnoki teyari angu, ta Temjen Toy-isa metetdaktsü.
Paisa tesayurtem dang dyslexia agi timtemba tanurtem ajitettsü aser parnok dak temulung agüja, yimya balaka nung sayutsü atema ayongzük.
Temjen Toy-isa SCERT nem workshop ayonga agiba atema tenüngsang agütsü.
Tanü technical session pungu tashi agi aser iba nung Founder of Centre for Dyslexia, New Delhi, Rama Tandon-i ‘Demystifying intellectual disabilities’, Pediatric Neurology, AIIMS New Delhi, Dr. Sheffali Gulati-i ‘Assessment & certification of students’, Head DEGSN NCERT New Delhi, Dr. Anupam Ahuja-i ‘Policy on Special education and curriculum’, Head of Standard and Quality Assurance, Skill Council for Persons with Disability, GoI, Dr. Niharika Nigam-i ‘Vocational training and skill development for students with disabilities’ aser Office of Group Director, Government Affairs and Public Policy-Microsoft India, Balendu Sharma-i ‘Technologies to Assist the Differently Abled’ onüktem lemsatep.
Sentong nung mendenji SCERT Senior Lecturer Daniel Thong liasü.