Nagaland nung Education system atema shisatokden agi

Kohima, July 12 (TYO) : Nagaland nung education system atema Naga Students’ Federation (NSF)-i Hotel Japfü, Kohima nung anogo ka shisatokden sentong ayongzüka agi.
Iba sentong ya “Generating improvement through research and development in educational system in Nagaland” omen nung ajemdaker secondary education aser degree courses atema agia liasü.
Sentong nung shisalen sayurtemji, University of Hyderabad Associate Professor Venusa Tinyi, Northfield School Administrator Pheluopfelie Kesiezie, Research Scholar NUEPA Lakpachui Siro aser SCTE Bendangyapangla nunger liasü.
Ano, Controller of Examination Nagaland Board of School Education Rangumbuing Nsarangbe aser Controller of Examination, Nagaland University Abemo natia o tatsütsü jembi.
“Nagaland sorkari Education Portfolio ya Cabinet jenjang agütsütsüla aser CCE mapa küma inyaktsüla” ta Bendangyapangla-i ashi.
Nagaland nung educational system ya Agriculture, Horticulture, Forestry, Animal husbandry, aser human resource nunga temulung agütsütsüla, kechiyong iba ajanga zünger mapa manguba khuret azüoktsü, ta Pheluopfelie Kesiezie-ia ashi.
Research Scholar Lakpachui Siro-ia tetsü-tebou mapang nungi tanur nem shisatsü agütsüba yimya indang onük jembi.
“Asenoki alima shisatsü angazüktsübaji kanga tongtipang saka asenoki asen nisung, litsü, lipoküm, putiotsü aser sobaliba senzüka meyutsütsüla. Educational curriculum nung asenoki item ya enoksemtsüla” ta Siro-i ashi.
Nagaland nung educational system yanglushitsü aser curriculum development, marking system, & management nung temulung agüja NSF-i iba alizüng tonga inyaktsü imlar.