Nagaland nung election agitsü renema lir: CEO Sinha

Dimapur, Rongchii/April 9 (TYO): Chief Electoral Officer (CEO) Nagaland, Abhijit Sinha, IAS-i Hombarnü ashiba agi, April 11 nü Lok Sabha aser Mokokchung district kübok 26-Aonglenden Assembly election agitsü atema renema lir.
Osangbenertem den sensaksemba mapang Sinha-i ashiba agi, Nagaland nung Lok Sabha polls atema electorates 12,13,777 lir aser 26-Aonglenden A/C atema 12,482 lir.
Paisa, tajemtsü tzü, power supply, metsümeshidak amala tenüngdakbatem state ajunga nung polling stations 2227 nungi shilem 90 nungbo renemogo aser matamabensartem atema ramp polling stations shilem 70 nungbo renemogo. State nung PwD voters 6002 aliba jangjaogo aser state commission-i nükpokertem atema Braille Braille Dummy Ballot Sheet benoktsü, ta ashi.
Security dak sendakba nung, state nung Central Armed Police Forces, Nagaland Police, District Executive Force, Home Guards aer Village Guard company 75 dak tema yokogo, ta paisa ashi.
CEO den repsema CEO, Returning Officer M Patton-i ashiba agi, Mon nung election duty atema VG 850 amshitsü aser Longling nung 300 aser Meluri nung 22 amshitsü.
CEO-isa Central Armed Police Forces tem tensa majungtsü ta bilemba tesem 172-i yoktsü, ta ashi.
Maneni polling party tem training tembangogo aser polling party timbaka Bodhbarnü pai tata polling stations temi aotsü, ta paisa ashi.
Polling personnel tem atema gari agi anünga mali ta shia Sinha-i ashiba agi, Kohima aser Dimapur nungi gari talila 704 gari meperiba district temi yokogo.
Paisa Assam nungi gari 728 bener aruba metetdaktsü.
Senotsü aser yi apuba indang jembidang CEO-i ashiba agi tang tashi nung sen 92,26,240 aser yi liter 62,948.92 puogo. Maneni temesepba chiyongtsü balala sen 3,03,33,284 alang apuba paisa metetdaktsü.
Election inyakyim nung kecha tetsükdaktsü madokdaktsütsü atema tang tashi nung nisung 858 nem Preventive Section of CrPC kübok tenangzüktepba nung sign südaktsüogo, ta pai ashi.
Election agiba mezüngbuba anogo nungi May 19 nü election metembang tashi osangkaket aser electronic media ajanga exit poll matoktsütsüla, ta Sinha-i ashi.
Kasa mapang nung Commissioner Nagaland aser Returning Officer, M Patton-i ashiba agi, Model Code of Code nung aibelenba atema candidate pezüprongla nem shows cause notices agütsüogo.