Nagaland nung election sunep sunepa kaogo

 Dilong ward, Mokokchung nung vote agütsütsüpurtem tarensena nokdaka aliba noksa nung angur.

Dimapur, Rongchii/April 11 (TYO): April 11 nü 17buba Lok Sabha Elections Dimapur district nung kanga takok ngua kaogo aser tang tashi nung mepetmesü adokba osang kecha mali. Dimapur district nung elector count 20,6188 lir kong voter tem nem parnok vote agütsüdaktsütsü asoshi polling stations 335 amenoka liasü.
NDPP aser PDA candidate Tokheho-i pa indang vote Naharbari Government High school, polling booth No.7, Dimapur III nung 7:00 ako shi nung agütsüogo. Iba osang agütsüba mapang tashi nung (4:20) Dimapur district nung poll percentage 72.65% liasü. Osang ajanga ashiba agi, Dimapur kübok polling station balala nung Ballot units 8, control units 13 aser VVPATs 17 Mock poll mapang melentsü aser vote agütsüba mapang Bus 3, CUs 3 aser VVPATs 6 melentsü.
Dimapur DC, Kevekha Kevin Zehol-i, election takok nung tembdangdaktsütsü mechi vote agütsü metenzük tsüngda polling stations kar semdanga liasü. Tanur tain aikati tanü vote agütsüba nung shilem agiba nguogo.
Kasa anogo Tuensang nunga DC aser DEO Tuensang Mohammed Ali Shihab den expenditure Observer DeepakBhai Zala aser SP Tuensang Bharat Laxman Markad nungeri Tuensang Sadar-1 kübok polling station timbaka aser Sadar -2 kübok polling station kar semdanga liasü.
St. John’s Higher Secondary School Tuensang nungi volunteer temi PWDs voter tem nem teyari agütsü. Kaketshirtemisa iba amala linük mapa tongtibang sentong ka nung PWD tem nem teyari agütsütsü atema parnok nem iba maongka agütsüba asoshi District Administration Tuensang dang pelaba metetdaktsü.
Parnoki ashiba agi, iba amala inyakyim nung yimya agi PWDs tem sendoker aser parnok nem teyari agütsüba ya parnok asoshi jangratemtsüka liasü. DC aser DEO Tuensang-isa St John’s Higher Secondary School Tuensang, Principal, Rev. Fr. Sivi George-i kaketshirtem nem temelaba agütsüba atema pelaba metetdaktsü.
Maneni Mokokchung nunga Lok Sabha Parliamentary menden ka atema election aser 26 Aonglenden Assembly Constituency By-Election takok nung kaogo. Mokokchung District kübok Polling station kecha nunga mepetmesü madoki election tembangogo. Polling station tem nung vote agütsüba nikongtsütsü 4:00 nung tembanga liasü. Electioneering Officials, District Administration, Security personnel aser Local Authority tem senteper meranga inyakba ajanga election inyakyim tesunep nung tembangogo.
Vote agütsüba maparen anepdang 7:00 ako nungi tenzük aser polling station ajak nung vote agütsütsüpurtem tarensena nokdaka aliba nguogo. Yimtsü yimbo aser tasodang nungi balaka sotetertem atema polling station tem nung maongka balaka agütsü.
Kasa mapang nung Kohima district nunga Polling stations 226 prongla nung Lok Sabha Election 2019 takok ngua agiogo.
Polling station 226 nungi 28 vote agütsüba inyakyim Live Webcast asü aser polling station trok nung offline video recording system amenoktsü.
Polling personnel 1130-i parnok nem lemzüktsüba mapa takok ngua inyakogo aser polling personnel 170 jungdak nüngdak peridaktsütsü atema reserved list nung yua liasü.
Kohima district SVEEP campaign kübok ‘Clean Elections’ dak sendakba nung sentong balala ayongzüka akaba sülen election kanga takok ngua kaogo, kong vote agütsürtem parnok indang EPIC card bener arua vote agütsüogo, aser iba card malirtem ECI-i latettsüba pei maitsü jangjatsü asoshi amshiba kuli kaket 11 rongnung ka bener arua vote agütsüogo, ta ketdangser sangdong ajanga metetdaktsü.