Nagaland nung election timi agitsü atema yimten teloktemi nangzük

Kohima, June 22 (TYO): Nagaland nung ochimashi mapatem ajak dera ya election lir, kechiyong election timi magitetba ajanga yimten nung ochishia meinyaktetter, anungji 2018 küm agitsüba election yabo merükmerüka timi agitsü asoshi yimten telok ajaki Nagaland Baptist Church Council (NBCC) pusema nokdaktsü, ta tanü yangi Kohima nung yimten teloktemi tenangzükba ka NBCC den agiogo.
Tanü Brehostibar nü NBCC teloki Nagaland nung tenteta aliba yimten teloktem den election merüka alitsü asoshi shisalemsatepba senden nung adenertemji Naga Peoples’ Front (NPF), Bharatiya Janata Party (BJP), Nagaland Pradesh Congress Committee (NPCC), Democratic People’s Party (DPP), Nagaland Congress, Janata Dal (United) aser Aam Aadmi Party (AAP) teloktem nungi lenirtem liasü.
Nagaland nung 2018 küm tetenzüklenbo election agitsü anendaka lir, anungji iba election nungbo vote mayoktsü aser vote malitsü aser pei vote peisasa enoktsütsü asoshi NBCC teloki anir tangatetba agüja jajadagi
Tanü iba senden nung adener yimten teloktem nungi lenirtem aser NBCC lenirtem na tsüngda taruba election nungbo nisung ajaki election nung timi shilem agitettsü tenangzüktepba agiba mapang parnoki peisasa pei tai aser tamakoktema dena nangzüka liasü.
“Nagaland nung küm aika election junga magitetba tai aser tamakokji onok ajak tamakok asütsü,” ta yimten aser Arogo lenirtemi metetdaktsü.
NBCC leniba nung Nagaland nung election timi agitsü asoshi inyakba nükjidong ya nübortemi yimten mapa nung shilem agidang Tsüngrem tsüngdang tai memenai ochishia shilem agitsü aser ibaji ajanga Naga nunger Khristan loktiliba merüka alitsü tangatetba nung inyaker, anungji ibaji mapa küma inyaktsü asoshi yimten telok ajaki NBCC den teka amteper tang nungibo election mapang sen agi vote malitsü aser memesüzüktsü ta telemtetba ka agiogo.
Kasa senden nungsa NBCC tsüngdang Tsüngrem tenüng nung yimten teloktemi tang nungi kin, kidong mesüra mepu mesüra yimtsüng shinga danga candidate balaka shimtsü majungshitsü aser election mapang party sen malemtsü aser party apia mapaa malemtsü ta nangzük.
Parnokisa election mapang yi mamshitsü, election camp memesemtsü, party office aser candidate ki dak alaka ki kecha nunga party flag masongtsü, lokti chiyonga mamongtsü, procession maotsü aser tashiyim amshia shingaia shinga amokmemerentsü ta tenangzükba agiogo.
Ano, Nagaland nung yimten telokisa NBCC tsüngdang Tsüngrem tenüng nung election mapang telongpur amshia tashiyim mapa meinyaktsü, election manifesto tejangja alitsü, ki sema vote yima mesenzütsü, NBCC teyuba nung anidaktsüsa party workers ajak azüoktsü, olulu meproktsü, tashiyim agi vote enoktsütsü memerangtsü aser nübortem asoshi yimjung, ochi aser terenlok atema inyaktsü nangzük.
Election mapang Clean Election Committee-i ayongzükba “Common Platforms” nung shilem agitsü aser NBCC-CEC Guidelines ajak nung mapa küma anidaktsü nangzüker ta yimten telok troki NBCC den Tsüngrem tenüng nung tenangzükba agiogo.