Nagaland nung electoral roll yanglushi tenzüker

Kohima, Oct.02 (TYO): Nagaland nung electoral roll reprangshia yanglushitsü asoshi tan October ita ka nü nungi tenzükogo aser sangküm 2017 küm January ita tashi nung tasoba küm 18 ajungertem tashi iba electoral roll nung enoktsü aser nisung tenüng talila mesüra tiyazü enoka lira agientsü.
Iba electoral roll yanglushiba sentong ya tenzüka, Honibar nü October ka nü Hotel Japfu, Kohima nung Chief Elecotral Officer, Sanjay Kumar IAS-i tang adoka aliba electoral roll sayatsüogo.
Iba sentong nung jembidang, iba electoral roll yanglushiba mapa ya taruba election junga agitsü atema inyaker asünungji yimten aser lokti tentet ajaki kanga temulung agüja inyakdaktsüner ta CEO, Sanjay Kumari metetdaktsü.
Kasa sentong ya Mokokchung nunga Mokokchung DC & District Election Officer, Sushil Kumar Patel-i Honibar nü sentong ka ayongzüka tenzüktsüogo.
Iba sentong nung ADC & Electoral Registration Officer Bendanglila den administrative officers aser yimten aser lokti tentettem nungi lenirtem arua denogo.
Iba sentong nung jembidang, Mokokchung district nung electoral roll shitak yanglutettsü atema talisa yimten teloktemi nisung tenüng talila enoka aliba aser asür tenüngtem enoka ali mali kanga junga repranga endoktsüla aser tasen shirnoksa küm agi abensar enoktsüla ali itemji kata mezüdoki enoktsüla ta metetdaktsü.
Kaket nung ajenzüker bener senzütsü tasak asüba agi, E-Roll Draft publication copy kaka soft copy nung yimten telok ajak nem agütsü.
Tang electoral roll yanglushiba sentong nung ya “claims aser objections” mapang October ka nungi 31 tashi alitsü aser itemji repranga November 30, 2016 tashi nung inyaktsü aser January 10, 2017 tashi nung electoral roll tasenba ya adoktsü.