Nagaland nung Film benjong tenzükogo

Kohima, May 11 (TYO) : Nagaland nung mezüngbuba Film benjong sentong ka tanü Brehosatibar nü yangi Capital Convention Centre, Kohima nung Information & Public Relations, Parliamentary Secretary, Imtikümzük-i semzüktsüogo.
Iba sentong ya IPR department-i Dreamz Unlimited telok den külem ser Nagaland nung film yangluba mapatem ajungshia tajung kümdaktsütsü asoshi ayongzüka lidagi.
Iba senrtong nung jembidang, iba ama film benjong ayongzüka akaba ajanga shilem agirtem rongnung loktiliba jenjang shitakba meteta shisalemsateptsü mapang tajung angur ta metetdaktsü. Sobaliba tetezü ya asenoki alima dang benshia sayuba mapatem asütsü aser sobaliba shiai tangatetba balala nung alima indang sayur, anungji kati ka dang angazüktepa alitsübaji kanga tongtibang ta Wb.Imtikümzükisa metetdaktsü.
Paisa India nung dang masü saka bendanglena dena Naga nungertemi yangluba film nüngtugu küma züngshitsüsa yanglutetba mapatem asoshi pelaba metetdaktsüogo.
Nagaland ya topur tajung lima ka lir, anungji film yanglurtem aruagi film yanglua inyaktsüsa government-ia akok tashi yariteptsü ta paisa metetdaktsü.
Iba film benjong sentong tenzüka Pradip Kurbah-i ketdangsüa yangluba “Onaatah” film sayu. Iba denji Kivini Shohe-i yangluba documentary film “Oh my soul”, Yapangnaro Longkumeri yangluba “The story of a river”, Sesino Yhoshü aser Sophy Lasuh nati yangluba film “Story of a house”, Vito Sumi-i yangluba “Backward is forward” aser Bendang Walling-i yangluba “Blissful” film nungertem liasü. Item dakji alaka ano Amateur Short Film Competition nung yangluba film tajungtem sayua liasü.
Iba sentong nung Film Facilitation Office, National Film Development Corporation, Ministry of Information & Broadcasting, New Delhi nungi aruba Leena Rani Narzary den shisalemsatepba mapang liasü.