Nagaland nung FM TRAGOPAN tenzükogo

Dimapur, October 2 (TYO): October 2, 2017 nü Akashvani conference hall Kohima nung FM TRAGOPAN ta ser radio station tasen ka tenzükogo.
FM TRAGOPAN tenzüktsüdang IPR Director, Limawati-i ashiba agi, “asenoki AIR meimer saka Nagaland nung nisung aikatia AIR aser tanga media house temi terenlok bener arutsüba atemabo asenoki jungjunga meshisadanger aser tenüngsang magütsür.”
“Osangtsüsangji tashi lir aser osangtsüsang ajanga nübortemi facility aser temeden angutsü atema tashi itshir” ta paisa ashi.
Tanü putu nung satellite aser cables adokba ajanga nisung aikati radio ya samatsü ta bilemer saka alima melenshiba ama Radio-a melenshir aser Nagaland nung nübortem tenzükba wadang nung tongti shilem agir, ta Limawati-isa shisem.
AIR Kohima-i Nagaland nungi sangdongba FM station ka lapokba atema tenüngsang agütsür. Nagaland nung alirtemi AIR FM TRAGOPAN nungi tajangzük agitsü aser kentenba mesüra tanga sempettem sayutsü merangang, ta paisa ashi.
Sentong nung mendenji Deputy Director General (Engineering) Head of Office, KV Ramachandran liasü aser pai ashiba agi, FM TRAGOPAN ya anepdang 6.00 ako nungi aonung 9.30 ako tashi lapoktsü.
FM TROGAPAN-i Nagaland nung aliba oshitem ajak sangdongtsü. Dimapur, Meluri aser Shamator nung FM relay stations amenokogo aser kobi melii Peren aser Wokha nunga amenoktsü, ta Ramachandran-isa shisem.