Nagaland nung Food Processing Industry nüngdaker

Kohima, August 28 (TYO): Nagaland nung nisung teimba ka aluyimba nung metaloka lir anungji food processing industry ajanga aluyimbaren jenjang tajungba kümdaktsütsü ta Additional Secretary of Ministry of Food Processing Industries (MoFPI), Dr. Rakesh Sarwal-i ashi.
Naga nunger lanur tazüngertemi food processing industrial entrepreneurships nung tetsüng ajemoka mapa inyaktsüla kechiyong iba ajanga nenok dang masü saka aluyimertem ajangzükdaktsütsü, ta Dr. Rakesh-i ashi.
Federation of Industry & Commerce of North East Region (FINER)-i ayongzükba Pradhan Mantri Kisan Sampada Yojna (PMKSY) sentong nung pai iba osang metetdaktsü.
Iba sentong ya Capital Convention Centre nung Ministry of Food Processing Industries-i teyari agüja ayongzük aser Department of Industries & Commerce, Nagaland-ia nungit. Nagaland nung entrepreneur temi alima jenjang nung tokteptsü koka lir aser food processing industry atema mozü mamshii tsünütetba nung tajangzük agütsütsü, ta Dr. Rakesh Sarwal-i metetdaktsü.
Nagaland nung local entrepreneur-i food processing technology tem, sorkari teyari balala agütsüba aser food processing policy tem indang osang metettsü atema MoFPI-i iba sentong ayongzük agir, ta paisa shisem.
Paisa State sorkar dang food testing laboratory talila lapoktsü atema ayongzük.
Entrepreneur kari nija food testing lab ka lapoknüra, MoFPI-i 50% teyari agütsütsü, ta paisa shisem.
Dr. Rakesh-isa district headquarters ajak nung entrepreneurs training centres lapoktsü atema tebilemba ka lemsatep.
Sentong nung Nagaland Chief Secretary, Temjen Toy-ia o jembidang “Naga nunger nütsüng yongsük nung 70% tashii aluyimba ajanga chiyunga-jema alir saka Nagaland nung aluyimbaren ya tajungba kümdaktsütsüla” ta metetdaktsü.
Nagaland nung aluyimer kati pei tsünütetbaji par alu adena bener aotsü nung timtem ajurur aser ibaji marketing outlets aser cold storages maliba ajanga lir. State sorkaria item tetsükdaktsütem agientsü atema lenmangtem bushidar, ta Temjen Toy-isa ashi.
FINER President, Pabitra Buragohain-ia o jembidang “Northeast tesem asoshi food process sector ya kanga tajung lir aser NE-i Centre sorkar indang Act East policy nungi tajangzük agitsüla. FINER-i Nagaland nung centre ka lapoktsü mulunga lir” ta metetdaktsü.
Tanü sentong nung shisalen sayurtemji Indian Institute of Food Processing Technology kübok Department of Food Packaging and System Development, North East Regional Agricultural, FINER, Ministry of Agriculture, Agriculture and Processed Food Products Export Development Authority aser Department of Industries & Commerce Nagaland nungi liasü.