Nagaland nung gari lenmanga ta asütsüsa lenmang mali : NPCC

Dimapur, May 17 (TYO) : May 9 nungi 14, 2017 tashi All India Congress Committee nung tezülur aser North East state-tem reprangtsü asoshi shimtetba lenir, Dr. K. Jayakumar den külemi Wokha, Zunheboto, Mokokchung, Longleng aser Mon sema jajaogo aser tamalen ghonda ka agitsüba lenmang nung ghonda asem agia liasü ta Nagaland Pradesh Congress Commitee nung tir Wb.K.Therie-i metetdaktsü.
Zunheboto aser Mokokchung na tsüngda aser Mon o Tizit na tsüngda lenmangji kecha gari lenmanga ta ajatsüla masü liasü ta paisa ashi.
Kodangsa tesem ka tongdir, item tesem ajak nung parnok agizüka jembirtem ajaki nümamedangteti “Rasta to enika hie ase” – lenmang ya yamai danga to ta shia liasü ta NPCC tirisa metetdaktsü. Nagaland nung 2018 election ya ajak asoshi tayongzükba tulu asütsü. Ibai asenok atema külemi tajungba küma melenshitsüba mapang mesüra külemi tamashi nisungtem ama ochimashiba yimten yimsüsüba kübok samatsüba mapang ka asütsü ta NPCC lenirisa ashi.
Tang government nung alirtemi taoba küm 15 tashi nübortem meyong rongsen auyadenogo aser tang parnok rongnung lemsar yimten tashi rakteper. Item ama ochimashir nisungtem nung jagi sübokrem agitsü aser senotsü auyatsü bilemtsüba daka alaka parnok dak nungi kecha tajung imlatsü mali ta K.Therie-isa metetdaktsü.
Nagaland nung giverment ketdangsertemi Village Council aser VDB purtem dang cheque nung kecha mezülui sign südaktsür. Iba ama tia nung yimtaklirtemia government-i terenlok mapa inyaktsütsü ta asübabo mamanger ta NPCC lenirisa metetdaktsü.
Joko nübortemi government-i terenlok mapa inyaktsütsü ta mamangba ajanga, nübortemi taitsüa maitsüi ajemajema dang election mapang ka atar ta paisa ashi.Tang ya NPF aser BJP na külem ser government bener aor saka parnok rongnunga meputep adokogo ta Congress lenirisa ashi.