Nagaland nung health care maparen majung: P Longon

Dimapur, October 21 (TYO): Nagaland nung health care facility Centre 566 liaka health care delivery system jenjang mejungi lir, ta Health & Family Welfare Minister, P Longon-i ashi.
Tarutsü doctor temi pei teinyaktsü wadang süoki ia bilemtsüla aser kechi tesem nung inyakdir inyakaka nübortem tajungtiba nung tenzüktsüla, ta P Longin-i tanü ayongzük.
Nagaland Medical Students’ Association hon jubilee mung nung pai iba tayongzükba agütsü.
Nagaland nung district hospital 10, state health food laboratory 1, TB hospital 2, para medical training centre 1, school of nursing 4, Ayush Hospital 1, community health Centre 21, primary health centre 124, dispensary 3 aser sub health centre 398 lir, ta paisa metetdaktsü.
“Nai nü mapa akhümtsübura aser temulung ajak agi nübor tenzükra, state nung talangtiba pilar aliba tesem nunga nü ket nung oset kar dang amer nübortem tenzükba nung nai tepela angutsü” ta Longon-isa ashi.
Longon-isa doctors aser medical practitioners akümtsüpurtem dang kanga junga shisadangtsü aser nübortem tajungtiba nung yaritsü asoshi bilemang, ta ayongzük.
Centre sorkari Kohima nung medical college ka yanglutsü mulunga agizükba atema Minister-i pelaba olen metetdaktsü.
Iba medical college nung 2016-17 tsüngda mezüng academic session tenzüktsüsa sorkari takok lenmang ajakleni merangdar ta paisa shisem.
Nagaland nung medical college lapokba ajanga tanga state tem nungi shirangertem arutsü aser ibaji ajanga state rongsenkettsüng tsütsü tajangzük angutsü ta Longon-isa metetdaktsü.
(Maneni tapak 9 nung…)