Nagaland nung ‘horti, forestry & fishery’ college tem lapoktsü

Kohima, August 9 (TYO) : Union Minister for Agriculture and Farmers Welfare, Radha Mohan Singh-i 13th Five Year Plan mapang Nagaland nung college asem- Horticulture, Forestry aser Fishery lapoktsü atema nangzük.
Mongulbarnü IG stadium, Kohima nung saisaponger 305 nem tetushi agütsüba sentong nung Nagaland Chief Minister, T.R Zeliang-i osangbener den sensaksemdang iba osang metetdaktsü.
T.R Zeliang-isa ashiba agi, Union Minister-i August 7 aser 8 anogotem Nagaland nung arua amungdang college tem lapoktsü nangzük.
State sorkari Nagaland nung Central Agricultural University (CAU) ka lapoktsü atema mepishiba nung Nagaland University nungi teshimtet nübotem aser Naga Hoho-ia pusema nungitba sülen Chumukedima nung Union Minister den sensaksemdang pai college asem lapoktsü nangzük, ta chief minister-isa metetdaktsü.
CAU melapokdang Nagaland state nung agriculture, forestry, horticulture aser fishery indang college tem alitsü nüngdak, anungji taruba Five Year Plan nung item college lapoktsü atema benoktsü, ta Union Minister-i ashi.
Union Minister-i Mithun anepalutsü atema sen sen crore 2.15 agütsüogo aser maneni Nagaland nung Mithun project atema sen agütsütsü nangzükogo, ta T.R Zeliang-isa osangbener dang ashi.
Kohima aser Dimapur tsüngda gari lenmang four lane yanglutsü dak sendakba nung Chief Minister-isa ashiba agi, iba mapa atema work order ano magütsü aser taruba ita ana-asem tsüngda tenzüktsü.
Iba mapa nung sensosangertemi yariteptsü atema T.R Zeliang-i mepishia metetdaktsü aser local contractor o ali kiburtemi terenlok mapa inyakba nung tetsükdaktsü majurudaktsütsü atema ayongzük.
Tan mezüngbuba atema Centre-i gari lenmang yanglutsü aser anepalutsü atema sen lemzüktsüogo, ta paisa shisem.
Dimapur aser Kohima tsüngda four lane mapa tenzükba sülen gari lenmang shibangtsüsa akümtsü, anungji iba mapa metembang tashi Niuland adena Kohima tashi gari lenmang ka yanglutsü, ta T.R Zeliang-isa metetdaktsü.