Nagaland nung Independent MLA-temi T.R leniba nungiter

Kohima, June 02 (TYO) : Nagaland tatar senden nung temendak Independent MLA par ti rongnungi nisung teneti Chief minister, T.R.Zeliang leniba nung kecha tetsükdak melii nungiter ta metetdaktsüogo.
Item MLA-temji Er Levi Rengma, Er. Picto , N. Jacob Zhimomi, Amenba Yaden, YM Yollow, S. Chuba Longkumer aser Toyang Changkong Chang nungertem liasü.
” Onok Independent MLA-tem asünungji political party kecha temzüng agia onok alena mali, anungji tawa NPF telok nung ‘show-cause notice’ agütsüba aser ‘ suspend’ sütsüba mparentem dak aketba onük nung onoki mekongshir, kechiyong ibaji onok rongnung masü saka NPF telok rongnung ataloker. Ajisüaka, NPF nung tang telemsa adoka aliba ya akok tashi longjemtsü merangtsüla, kechiyong iba jagi NPF teloki aniba DAN sorkar tashi itshitsü,” ta parnokisa metetdaktsü.
Sorkar nung lenir ka yaritsü aser meyaritsübaji Independent MLA shia pei mulung lir, anungji onoki tang T.R.Zeliang leniba kübok terenlok mapa tajungtiba agi inyaktsü mulungtetba aser nübortem asoshi mapa ajak timi inyakteta aotsü akokba reprangteta tamalen taoba Chief minister, Neiphiu Rio-i pa menden toktsür Lok sabha-i aoba mapang nung lemtetba ama T.R.Zeling leniba nung akok tashi nungita aotsü lemtetter ta Independent MLA-temisa nenshia metetdaktsü.
Tang aliba NPF teloki aniba DAN sorkar ya tatem tashi aotsü teimla tulu alinungji, shingaia T.R.Zeliangi aniba sorkar nem timtem magütsütsüla ta parnokisa mepishia metetdaktsü.
Onoki tang India sorkar o NSCN-IM na tsüngda Naga yimten ken o jembiba maparen nung tashi ajak agi nungiter aser Naga nunger asoshi yimten telatetba tajung ka bener arutsü merangba maparen nung maneni yariteptsü ta Independent MLA-temisa metetdaktsü.