Nagaland nung industry ajak shibangdang asür odila Sashimeren Aier menungra bilemteter

~ T. Alem Lemtor, Diphupar.

Iba ocet zülur küm 32 (thirty two years) tashi capacity balala nung Nagaland Sugar Mill Co. Ltd. A Government of Nagaland undertaking nung inyakdang ajangshia aruba, iba kesa danga factory nunga atalok südi ta bilema yangi tongmelang agi onük kar yamai lemsateper.
FACTORY RANGLOK
Heavy Industry Nagaland Sugar Mill Co.Ltd aser Hindustan Pulp and Paper Mill Tuli ama factory nung telok telemsa yamai alitsüsa akümer.
A. Administration under Director of the company.
B. Accounts under Account officer.
C. Engineering wing under Chief Engineer.
D. Manufacturing wing under Chief Chemist.
E. Electrical wing under Electrical Engineer.
F. Raw materials Dept. (Sugar cane, Bamboo) under train agri officer.
G. Security Dept. under security officer.
H. Labour Dept. under labour officer.
I. Purchase section under purchase officer.
J. Construction under S.D.O.
K. Store section under store officer.
L. Medical section under medical officer.
M. Factory dak sendakba workers, trade union aser growers associations both under office bearers.
N. ESTABLISHMENT- Under head clerk.
Item workers ajak ghonda 24 (twenty four hours) maneni shift asem lemsar season matem tashi inyaker.
STAFFING PATTERN:
Industry ajak shibangba rongnung talisa Paper Mill aser Sugarmill shibangtsüsa akümbaji tongtipangsa nüngdakba post dak alaka menüngdakba tali appointment asüba agi ta jangja-a meteter. Factory ka nung tamasa staffing pattern management-e approved asütsüla. Paper Mill nung over staff ta jembibaji ashiko Staffing pattern approved süa maliba agi südi ta bilemer. Sugarmill nungbo 1973 nungi 1996 tashi staffing pattern approved süa maliasü. Staffing patternji 1997 kümang Mill shibangtsü anasa-ang approved asü saka menuadoker liasü. Sugar Mill tenzükdang management nung high officals ajak non-locals liasü. Küm 20 sülenbo non-local post kar dak alaka local skilled workertemi Millji run süteta nübu peria aküm. Staffing pattern approved asüba ajanga high officals temi aginüba ama menüngdakba talila appointmentji magitettsüsa alenpanger ayur. Yimya agi raw materials (Sugar cane Bamboo) tanem tanemi küm 4 nung 6 tashi nungang aluyimertemi supply sütettsü. Mill management-i ibaji angateta approved süa aliba post ajakbo kenyongi appoint masü tajungba.
BOARD OF DIRECTOR:
Nagaland Sugar Mill Co. Ltd. Nungbo 1980-1981 season küm tashi Board of Director Chairmanji Chief Secretary liasü. Iba sülen Chairmanji Minister aser MLA melentepa aru. Takoktsü ka asübo ruling Govt.-i Minister aser MLA tüm factory nung Chairman inyaktsü meyok tajungba asütsü.
TEBILEMDANGTSÜ KAR:
Factory tasen ka lapoktsübaji temela masü. Saka kodang tasak ta jangjajangja-a aser taroki-ia bilemdanger yakyakta Mill meshipangdaktsüner. Shidi süra Dimapur District ama aluyimtsü jaka tulu tsünglutsü teperi ali temo aser communication temela aliba jaka ka nung Sugar Mill ama ka ayutsübaji jangratemtsüka lir. State aeika nung mojilu ayimtsü atema water pump nüngdaker aser fertilizer nüngdaker. Saka Dimapur area nungbo itemji kecha mamshi-e aru. Tuli area nung pasasa adokba bamboo aeika lir aser Paper Mill company-i yimtsüng aeika nung ali tululu alir Bamboo atemba aeika angutsü. Tuli area nung Paper Mill ka alitsübaji kanga tetemsü jaka ka lir. Sugar Millbo ali nung tur remogo, saka Paper Mill ali nung tur aremtsü lemtet, saka tang tashi alinung marem. Tatishitsü agi Paper Mill tasen ka yanglutsü atema sen Crore 50 shi nüngdak. Saka Paper Millji shia arutsü (survival) atema sen crore 10 nüngdaktsü.
Atangji sugar kg 1 nung mesüra paper kg 1 nung sen kwi endok ta Board of Director meeting nung jembitsübaji tim dang. Saka iba den aluyimertem parnok sen aeika endokba inyakba Moji aser Bambooji koda? Worker meyirjang junga kibongtemji koda asütsü? Parnok timbaka jungjunga hikatetertem lir. Iba District nung yimtsüngpurtemji koda ta asadanga bilemdangba den State Govt. tenüng tajungjia kanga tongtipang asütsü. Kechiyong tarutsü nung State Govt.-e outstanding Factory lapokyonga aotsü idangji financial agencytemi Govt. dak tamang akatsü nüngdaker. Hau, India nung sick unit factory aeika shipangogo aser ano shipangtsüa akok. Saka Nagaland nungbo Mill ajak shibangogo. Menen nung alir temi ya zübazüba-a mebilemtsüla. Menden nung alir tem aser decision makkking body-e kanga kümdanga telemtetba agitsü nüngdaker.
Nagaland state ngur joko küm 57 ajunger. Industry Dept. ajanga Factory aeika tenzükba tejangja record lir, itemji yamai – Nagaland Sugar Mill Co. Ltd. Dimapur, Pulp and Paper Mill Tuli, Mechanised Bricks Factory Dimapur, Distillery Unit Dimapur, Fruit Canning Factory Longnak Mokokchung, aser Khansary Sugar Factory Jaluki. Item mill ajakji tesasatsüka aser tapayutsüka shipangogo. Factory ajak telatet inyakyim lir. Central Govt.-e yangluba factory ACT kübok state ajak nung par area den apet state ACT enoksema yanglur factorytem achayanger. Ibaji Nagaland nungbo tanü tashi merenemtet südi.
Asür odila Sashimeren Aier industry secretary inyakba mapang 1967 küm Dimapur nung Sugar Mill ka lapoktsü atema Sugar Industry expert kar anir arutsü lemtetba ama National Sugar Institute Kanpur U.P nungi Dirctor Suresh Chandra Gupta Dimapuri arua area ajak survey süa renemba ama Sugar Mill yanglur 10th March 1973 küm commission asü. Industry yimya kenyongi memetetba Naga nunger noklang aeika den non-local technical meteter dena appoint sür factory mapa tenzük. Iba mapang aeiben local workertemi non-local officertem inyakyim nung temulung masü aeiben situation majung liasü. Idangji odila asür Sashimeren Aier Secretary of Industry yakta dang Kohima nungi Dimapuri aluli aser worker den ajurutepli ta asü. Iba ama mangatettep mapang nung ajurutepdang kenü pai onok dang yamai ashi, “Rome was not build in a day”, nenoki anir tangatettep nung iba Mill anepaluangma no ta ashi. Angazükba agi Paper Mill yanglutsü atema odila asür Sashimeren Aier-e anir Foreign Country tashi nung senzüa Tuli Paper Mill lapok. Pa dang (SASHIMEREN AIER, THE FATHER OF INDUSTRIES OF NAGALAND) Nagaland Industry tebu ta ajatsü langa lir. Pa ama ka menden shitak nung amen nungbo Mill tem shipangtsü melena outstanding factory ishika lapoker lila ta nemjema bilemteter. Shipangtena aliba factory ajak (infrastructure) jenjang temela yong meyokdoki jungjunga shipanga, anepalua ayutsü junger, kechiyong naga nunger senso tajung aeika adoktsü aser parnoki melamela-a Millji run sütettsü.