Nagaland nung International Day of Older Persons amung

Kohima, October 1 (TYO): Nagaland nunga Deobarnü International Day of Older Persons ayongzüka amung aser iba anogomung nung tantsü-tambutemi ajangshia arubatem nung ajemdaker state nung nübortem putepa alitsü aser angatetteptsü atema mapa inyaktsü tayongzükba agütsü.
Social Welfare Department-i ayongzüka amungba sentongji was “Stepping into future: tapping the talents, contributions and participation of older persons into society” omen nung ajemdaker liasü aser sentong tongtibaji Red Cross Conference Hall, Kohima nung agi.
Sentong nung Nagaland State Social Welfare Board Chairperson, Bano Vinito-i o jembidang, “taintemi lanuputu ajungmesotsüla aser yaritsüla” ta ashi.
Tanü lanurtem dak nungi yimya aser tangatetba tajungtem sama odar, anungji taintemi khuret bena tangatetba tajung nung lanuputu nem tesayuba agütsütsüla, ta lai ayongzük.
Nagaland Senior Citizens Forum tenüng nung jembidang K.K Sema-ia, “Naga loktiliba nung ochimashi aser yimten tebilemtsü agi sünga lir aser asenoki ajangshia arubatem lemsatepa asen loktiliba nung tensa tajungba bener arutsüji tang ya mapang tajung lir” ta ashi.
“Nagaland nung AFSPA aser Disturbed Area Act dena ozüng tesashitem agütsüba ajanga tensa mesüngjemteti lir anungji onoki Centre sorkar dang item ozüngtem meyipa agitsü aser tanü putu den apet ozüngtem agütsütsü mepishir” ta K.K Sema-isa ashi.
Naga yimten tebilemtsü atema Naga nunger ajaki agizüktetba telemtetetba ka teintet rogotem agidaktsünür, ta paisa shisem.
Iba sentong nung teintet rogo noklang aika nem sempet agütsü aser nisung ana nem state level award 2017 agütsü.
Tanü Nagaland Peace Centre Chairman, N Theyo aser Meyisongla na nem state award agütsü aser külen Renchano Kent o Rev L. Suohie Mhasi na nem Kohima district award agütsü.
Sentong nung Sumi Baptist Church Kohima nungi Kashito Aye-i temoatsü meshia sarasadem, Social Welfare Department Director, T Merangsungba Aier-i tesentepertem pela agizük, Phom Baptist Church züngsemtemi ken ka aten aser OSD Social Welfare Kewe-ü Kenye-i anküp tepela o jembi.