Nagaland nung “International Nurses day” among

Naga Hospital Authority Kohima nung Nursing school nung azüngertemi International Nurses Day amongba sentong nung ken atenba angur.  Kohima, May 12, 2017.

Kohima, May 12 (TYO) : Alima ajunga den külemi Nagaland nunga tanü Hokolbar nü “International Nurses Day” mongogo.
Kohima nung iba anogomong sentong ya Trained Nurses Association of India (TNAI) Local Branch Kohima ajanga ayongzüka DBT Conference Hall, Naga Hospital Authority Kohima (NHAK) nung monga liasü.
Iba sentong nung tongti tesemdanger, NHAK Managing Director Dr. Neikhrielie Khiamia-o-i jembidang, nurse-temi taniteblem arema meranga inyakba agi tanübo NHAK ya state nung mozü ki tajungtiba ka kümogo ta nursetem mapa reprangteta parnok nem tenüngsang agütsü.
” Ni kü den inyaker nurse-temji mapang shitak amshiba, ochishir, meranga inyakba, temerük, süoshi junga sübuba, yimya tajung aser ajak dak alaka temeim lia anepalurtem südaktsüner,” ta paisa ashi.
Dr. Khiamia-o-ia nurse-tem dang parnokji shirangertem anepaludang awashi temetet, o tanep aser aremzüka anepalur ka südaktsüner ta metetdaktsü.
Iba mozü kidangi taneptsü bushia arur sensakertem dang meima Nightingale-i inyakba ama inyaktsüla ta paisa metetdaktsü.
Iba kasa sentong nungsa School of Nursing, NHAK nung Principal, L. Watimongla-i iba anogomong omen nung jembia liasü. Iba küm asoshi iba anogomong atema shimtetba omenji ‘Nurse mapa inyakba ajanga alima meraksai tajungba küma aotsüba nung yarir,’ ta shimteta liasü.