Nagaland nung International Nurses Day amung

Kohima, May 12 (TYO): Tanü Environment, Forest & Climate Change Minister, Dr Neikiesalie Nicky Kire-i medical nung inyakertem, talisa doctor aser nurse tem dang longjemer health care service balala tajungtiba nung agütsütsü atema ayongzük.
Tanü nikongdang Naga Hospital Authority, Kohima nung ‘Nurses: A force for change: Improving Health System Resilience’ omen nung International Nurses Day sentong nung jembidang Dr Nicky-i, “Doctor tem aser nurse tem, kati ka nüngdaker, anungji asenoki asen mapa mesentoki longjemer inyaktsüla,” ta metetdaktsü.
Nurse tem ayongzüka pai, “Tajungba ka atema melenshitsü asoshi peisasa ano asentenshir nendaka inyaktsüla, iba den külemi iba maparen nung ajemokba nükjidong tanaben shisadangtsüla,” ta ashi.
“Asenoki inyakba ajakji aseni khuret süa agitsüla aser asenok dang nungi imlabaji angatettsüla,” ta minister-i ashi.
Paisa, kati ka ajungshiteptsüla aser shisabolu makai inyaktsüla, ta ashi.
Tangalen nurse kanga nüngdaka lir, anungji nurse temi state adena oor inyaktsü atema maongka agitsüla, ta pai ajungshiba den külemi tejangrar nurse tem akokba tashi agi yaritsü, ta paisa metetdaktsü.
Kasa sentong nung Deputy Director of Nursing, Vilhoulenuo-i International Nurses Day omen teratet lemsatepa liasü.
Tanü iba sentong nung Tsüngrem teyari meshia NHAK Chaplain, Bendangtemsu-i sarasadem aser sentong tenzüka Nursing Superintendent, Nzule Semy-i milen tsüklok.
Trained Nurses Association of India Local Branch Kohima Tir, Rita Angami-i okila jembi aser general secretary TNAI Local Branch Kohima, K. Anatoli-i tepela anküp o jembia liasü aser Nursing student tem den Dziesekhrienuo Keretsü nungeri ken aten.