Nagaland nung inyaktur aliba lenmangtem yanglu tenzüktsü

Kohima, Oct.15 (TYO) : Nagaland nung SARDP-NE project kübok lenmang sademsadema 2 lane atutsü asoshi lenmang pezü yanglutsü tenzük saka jenjang yanglushitsüsa akümba agi meinyaktet anenba sülen, tang Guahati high court-i item lenmangtemji hopta ka tsüngda yanglu tenzükshitsü asoshi obendang agütsüogo.
Item lenmangtemji Mon-Tamlu-Merangkong, Longleng – Changtongya, Phek-Pfutsero aser Chakabama – Zunheboto tsüngda yanglutsüba lenmangtem lir. Item lenmangtem ajak sentepa kilometer 329 asütsü.
Item lenmangtem ya Northeast nungsa süaka tenem tekong kanga alidak tesem asünungji, tamasa yangluba sen agibo meperitsüsa aküm, anungji project ajakji sentepa sen crore 2,978 nüngdaktsü ta yangluba sentongji shitak dang liasü ta okadak obendangeri metetdaktsü.
Tamalen iba lenmang yangluba maparen ya reprangdanga tenzükshitsü asoshi okadak nungi obendangeri August 4, 2015 nü Supreme court nung Senior Advocate, Wb.Pradip Rai commissioner ser Independent Court Commission ka shimtsü aser parnok jagi lenangtemji tonga oagi reprangdanger anogo 45 tsüngda osang agütsütsüla ta okadak ken o lemtettsü. Iba ken o jembidang yariteptsü asoshi okadak ken o agütsürtem asoshi jembitsür okatsür (advocate) Anshuman Sarma, advocate, Guwahatii commissioner mapa nung yaria liasü aser ano Commmission mapa nung yariteptsü atema Nagaland state tenüng nung shilem agitsü asoshi NPWD (W&H) nung legal officer Wb.Temsü Soyah shima liasü.
Iba commission jagi mapang shitak nung parnoki bushitetba osang renemer agütsü aser iba osang nung Nagaland ya tanga Northeast state-tem dang nungi balaka asünungji, jenjang atutsübaji tim dang liasü ta kuli agütsü.
High court nung ken o tatsü talang ajak jembia angadangba sülen Ministry of Road, Transport & Highways, Nagaland PWD (NH) aser contractor, M/S.IL&FS-Gayatri (JV) purtem dang Revise Estimate nung aliba sen sanction sütsür hopta ka tsüngda mapa tenzüktsüla aser ita ka tsüngda sen magütsüi aliba ajak agütsütsüla ta metetdaktsü.
High court-isa item lenmang yanglurtem dang mapaji ita 18 tsüngda renemtsüla aser item maparentemji ajakji shitak inyaka aotsü atema MoRTH, PWD(NH), Nagaland aser Contractor tsüngda tangatettep ken o ka renema ayutsüla ta metetdaktsü.
Item lenmangtem yangluba mapa ya shitak inyaka odaktsütsü asoshi repranga inyakdaktsütsü atema okadak obendangerisa retired High court Judge, R.B.Mishra commissioner asütsü shimogo. Pai lenmang yangluba mapa mapang shia tonga oa reprangtsü aser contractor nem sen agütsüba maparen dena reprangtsü.
Nagaland nung gari lenmang yangluba mapatem rongnung tang ya tuluba asütsü, saka lenmang teyangludak nung timtem kar adokba ajanga meyanglui anena liasü. Ajisüaka, National Highways minister Wb.Nuklutoshi-i anir Works & Housing nung Comissioner & Secretary, Himato Zhimomi aser Chief engineer PWD(NH) Er.V.Kehie nungertemi kanga meranga inyakba ajanga tang iba mapa ya shitakba nung renema inyaka otettsüsa takok nguogo ta NPWD (W&H) nung Legal Officer, Temsü Soyahi sangdong ka nung metetdaktsüogo.