Nagaland nung ITI tasen 2 lapoktsü atema kimung nüngdaker

Dimapur, June 20 (TYO): Ministry of Skill Development and Entrepreneurship (MSDE)-i Nagaland nung ITI ana lapoktsü atema maparen inyaker aser iba atema state sorkar nungi ali indang osang atar, ta Union minister Rajiv Pratap Rudy-i ashi.
Mongulbarnü Chumukedima police Guest house nung osangbener den ajurutepa sensaksemdang Rudy-i iba osang metetdaktsü.
June 21, 2017 anepdang 8:30 ako nungi Agri Expo site, 4th mile nung International Yoga Day amungtsü aliba sentong nung adentsü atema Rudy Nagaland-i aru.
Iba sentong ya MSDE-i Ministry of Ayush den yaritepa linük ajungalen ayongzüker.
ITI anaji Kiphire aser Longleng district tem nung lapoktsü aser Nagaland nung ITI teimbaka nung teburtem hostel lapoka lir aser ministry-i tetsürtem indang hostel lapoktsü bilemer, ta Rudy-isa osangbener dang ashi.
State sorkari ITI tem indang infrastructure melentsü atema asüngdangogo aser ibaji ministry-i asadangdar, ta paisa shisem.
BJP-i aniba NDA sorkari North East tesem renlokdaktsütsü atema tongti süa mapa inyaker, ta Rudy-isa metetdaktsü.
Linük nung nashishi nokdangba ajanga Nagaland state nung ola adokba atema osangbenertemi asüngdangdang Rudy-i “nisung ka achiajemba azüoktsü makok, asenoki nisung ka indang tamangba yimsü aser inyaksangshi akhümtsübutsüla saka linük temzüng anema menokdaktsüla” ta langzü.