Nagaland nung June 12 nungi June 24 tashi IDCF akatsü

Kohima, June 09 (TYO): Nagaland nunga linük den jangyu medema June 12 nungi tenzüka June 24, 2017 nü tashi Intensified Diarrhoea Control Fortnight (IDCF) akatsü.
Hopta ana tashi iba sentong akaba nükjidong ya, tanur asüdang tebok aoba (diarrhea) ajanga tanur ka danga mesüdaktsütsü atema lir.
Iba nükjidong ya ORS aser Zinc agi arishi küm 5 ser tekübok tanur aika ayimjemtsü atema lir, aser talisa ibaji tongtibang tesemtem aser iba tashidak agi tamajungba kongshiba tesemtem nung rangloker inyaktsü.
Tanur rongnung diarrhea tashidak ajanga arishi küm 5 ser tekübokpur aika asür, aser item züngar asürtem shilem 11 bo iba tashidak ajanga asür, ibayongji linüki iba tashidak anema rangloker inyaker.
Department of Health & Family Welfare (H&FW) den Allied Department- PHED, Social Welfare, Education, Indian Association of Pediatric Nagaland Branch (IAP-NL) aser Naga Mothers Association (NMA) ama CBOs/ NGO temi school tem nung teka junga metsükba yimya sayutsü, ORS depot atema Anganwadi Centers aser anganwadi ajanga diahorrea agi shiranger arishi küm pongu ser tekübokpur jangjatsü..
Department-isa PHED dang School tem, Anganwadi Center tem aser Health Units nem tzü temerük aser tzü tajemtsü tajung agütsütsü atema metetdaktsüogo.
Linük nung küm shia diahorea ajanga tanur lakh 2 shi asür, aser iba tashidak ya talisa tatsü mongpu aser tzüngluruwa mongpu nung pokteter.
Iba tashidak agi tamajungba kongshibapurtemji, arishi küm 2 ser tekübokpur lir aser chiyungtsü agi matuba purtem lir.
ORS (Oral Rehydration Solution) agütsüba aser Zinc tablets den chiyungtsü tajung agütsüba ajanga iba tashidak nokdangteter aser aneper.
Iba dak sendakba nung National Health Mission, Nagaland-i arishi küm 5 ser tekübok tanur aliba kibong shia dang hopta ana mapang nungji item angati service agitsü metetdaktsüogo. Arishi küm 5 ser tekübok tanur alir kibong shia nem ORS packet kaka aser Diarrhea agi shiranger shia nem ORS aser Zinc dena agütsütsü.
Osang tejangja metetpelatsü atema anasatiba Health Units mesüra ASHA den tongteprateptsü akok.