Nagaland nung Khristantemi politics süoki ia bilemtsüla

Kohima, Luchii (December) 3 (TYO): Nagaland nung Khristantemi politics süoki ia bilemtsüla kechiyong politics majung masü saka politics nung shilem agiba nisungtem ang majung ta taoba Naga MP, Khyomo Lotha-i ashi.
NBCC Platinum jubilee Hall nung tanü “Church and Politics and the Role of Christian” indang sentong agidang “Arogoi politics atema süoki ia bilemtsü mapang ka tongogo kechiyong sorkar kümtetbaji nübortem ajangzüktsü atema lir” ta Khyomo-i metetdaktsü.
Sentong nung Nagaland Joint Christian Forum President, Rev Zelhou Keyho-ia o jembidang “Politics melenshitsübaji Arogo lir saka asenoki meinyakra politics ajanga Arogo melenshitsü kechiyong Khristan tajung ka aser tenüng atema Khristan ka tsüngda tebendang tulu lir” ta ashi.
Nagaland Joint Christian Forum (NJCF)-i iba sentong ya pastors, seminary tesayurtem aser kaketshirtem atema ayongzük. Iba sentong nung shisalen sayurji Rev. Frederick John “Fred” Nile liasü. Pa ya Australia Assembly indang Upper House nung mapang talangtiba inyakba parliamentarian lir. Rev. Nile ya Christian Democratic Party of Australia nunga Chairman lir.
Rev. Nile-i pa küm 30 dak tema yimsüsür ka ama inyaka aruba indang osang lemsatepdang pa seminary student ka ama politics nung tetsüng ajemok ta ashi.
Theological student ka asü nunga Khrista aser Laishiba nung ammeter alitsübaji temela masü aser iba tangatetba ya politics nung benokba ajanga tayongzükba tulu ajurur, kechiyong mapang talangka politics nung tamangba yimsü medendaktsüba ajanga ongdang tulu adoka lir, ta paisa metetdaktsü.
“Yimsüsür aikati Laishiba indang mejembir aser tamangba yimsü tetuyuba ama malir. Ajisüaka, ni yimsüsür ka ama liyonga arudang yimten tsütsü telemtetba agiba ajak nung Laishiba dak ammetba aser Khrista dak tamang ayuba nungi mepila” ta Rev. Nile-isa shisem.
“Australia nunga ochimashi lir saka tangari inyaker ta ser Khristantemi inyaktsüla ta masü. Iba ya Khristan yimsüsürtemi teti ajuruba tayongzükba ka lir” ta paisa metetdaktsü.
“Khristan yimsüsürtemi shilem ana agitsüla- shitak inyaktsü aser osangtajung kuli sayutsüla. Asenoki asen tamangba yimsü aser Laishiba dak chichia amangra temelenshi angutsübaji takoktsü lir” ta Rev. Nile-isa ayongzük.
Iba sentong lennirji Rev. Dr. Zelhou Keyho liasü aser pastor tem, Seminary tesayurtem, yimsüsürtem, public lennirtem aser NJCF Executive members aden.