Nagaland nung kin ajaki telongjem atema inyaktsüla: S. Chuba Longkumer

Dimapur, September 25 (TYO): Loktiliba renloktsü atema tongtibangtibaji telongjem nüngdaker aser Nagaland nung aliba kin ajaki telongjem atema inyaktsüla, ta Veterinary & Animal Husbandry Parliamentary Secretary, S. Chuba Longkumer-i ashi.
September 24, 2016 nü Zeliangrong Students Union Kohima pur 40 buba Annual General conference nung S. Chuba-i tongti tesemdanger ama shilem agidang iba onük jembi.
“Zeliangrong ji tanga kintem ama khenyongi kin balaka lir aser nenok Nagaland adena orr Assam aser Manipur nunga lir. Anungji, Zeliangrong nungertem longjemtsüla aser ibaji ajanga nenok dang masü Nagaland-a tashitaitba akümtsü,” ta pai kaketshirtem ayongzük.
Zeliangrong nunger tsüngda mulungsoa longjemra, nenokji state asemprongla nung yimjung osangbenertem ama asütsü, ta paisa shisem.
Tanü asenok temelenshi putu ka nung alir aser iba dang ‘information revolution’ ta ajar. Iba nung ya shisatsü kanga tongtibang lir, aser iba jagi tashitait nisungtemji quality education angurtem lir. Anungji, kaketshirtemi shisaliok jenjang tajung angazüktsü merangtsüla, ta Parliamentary Secretary-isa ayongzük.