Nagaland nung küm 2 tsüngda gari lendongtem nung nisung 122 asü

Kohima, Rongchii (April) 30 (TYO): Tesüiba küm ana tsüngda Nagaland nung gari lendong balala nung nisung 122 tashi taküm sama aser nisung 956 yiru.
India nung minute shia gari lendong ka ataloker aser küm nung gari lendong tulu 5,25,600 tashi ataloker, ta Senior District Transport Officer Kohima, Yaongsanglee Chang-i ashi.
India nung küm shia gari lendong balala nung nisung 1,48,920 tashi asür, ta paisa metetdaktsü.
Capital Convention Centre nung 29 buba Road Safety Week amungba mapang Road Safety Awareness ta ser workshop ka agidang Yaongsanglee Chang-i iba osang metetdaktsü.
Nagaland nung 2016 aser 2017 nung gari lendong 1432 tashi atalok aser lendong balala nung nisung 122 asü aser 956 yiru. 2016 küm gari lendong 736 atalok aser 2017 nung 696 atalok, ta paisa ashi.
Nisungtemi Road Safety nung temulung magütsür aser asenok lendong kecha majurutsü ama bilemer. Ajisüaka, asenok kodang gari anir asen taküm mesüra gari nung mena aliba tangar ajak indang taküm asoshi tebilemtsü abentsü angatettsüla. Aji dang masü, asenoki gari anir aodang lenmang nung senzür noklang aika den ano tanga garitem nung mena alirtem asoshi bilemtsütsüla, ta Yaongsanglee-i metetdaktsü.
“Nai nür kibong, na anasa alirtem meimerbangla, nai two wheeler anidang helmet semang, two wheeler sülen ameneria helmet asemtsüla. Ano, gari nung amendang seat belt enokang kechiyong nü indang seatbelt medeni car air bags mapa meinyaktsü. Nai garitsüng nung mopung jungjunga reprangang aser kümdanga aniang” ta paisa ayongzük.
Tanü garitem nung technology kanga renlokogo, anungji gari lendong teimbaka meimchir mekümdangba ajanga ataloker. Gari lendong aika nung insurance agizüktsü indang onük melira, lendong atalokba tera bushitsü atema technical officers teyari magir, ta Senior DTO-isa ashi.
“Shitakba agibo technical report tem ajanga lendong kanga bulua atalokba tesemtem metettsü aser itemji black spots, blue spots ama ajiteta ayur aser road technology tajungba kümdaktsütsü atema tebilembatema lemsateper” ta paisa shisem.
Gari lendong teimbaka temulung magütsüba ajanga ataloker aser garitem kanga kara ania tangar garitem ajateta senzüba VIP inyaksangshi ajanga gari kara anitsü yimya sübadaktsür, ta EAC Kohima Changsang-ia o tatsüka jembidang ashi.
Asenoki road safety nung temulung agütsütsüla aser school tem indang curriculum nung road safety dendaktsü nung ajungtsü. Iba ajanga tila asüdang nungi road signage aser traffic signals meteta akümtsü, ta Changsang-isa shisem.
Iba sentong nung DSP (Traffic) Phillip Yanthan-i Kohima jila nung traffic management aser Senior Motor Vehicle Inspector Tatongtemsu-i Road signs & penalties onüktem nung ajemdaker technical session agi.