Nagaland nung May 28 LS by-election atema renema lir

Polling anogo nung voter’s slip mali yonga tanga kulikaket agizüktsü

Kohima, Monupii (May) 26 (TYO): Nagaland election secretariat-i Lok Sabha by-election tiptema agitsü atema renema lir.
Nagaland nung vote agütsür nisung 11,97,436-i Monupii (May) 28 nü vote agütsütsü aser vote agütsürtemji tebur 6,07,589 aser tetsür 5,89,847 lir ta Chief Electoral Officer (CEO) Nagaland Abhijit Sinha-i tanü osangbener den jembidang ashi.
Taküm Lok Sabha by-election ji People’s Democratic Alliance (PDA) candidate Tokheho Yepthomi aser opposition NPF candidate C Apok Jamir na tsüngda tokteper.
Taoba MP Neiphiu Rio-i Tsüklai (February) ita State Assembly election nung shilem agitsü asoshi menden toktsüba ajanga Nagaland Parliamentary Constituency indang by-election agitsüsa akümer. Rio ya tang Nagaland nung chief minister teinyakdak lir.
Nagaland nung polling station 2196 lir aser iba nung 260 ‘critical’ aser 211 ‘vulnerable’ ta ajiteta aliba dak alaka tanüngba ajakji normal polling stations lir, ta CEO-isa ashi.
Longleng district kübok aliba Polling Station No. 1 Ladigarh ji Assam aser Nagaland tsüngda Disturbed Area Belt nung lir. Iba arrtsü tesem atema ken o ka adoka lir aser Supreme Court nung benoka lir, anungji iba polling station nung vote agütsürtem asoshi tanga tesem nung polling station ka lapoktsütsü, ta paisa ashi.
Nagaland kübok polling station 1855 nung anepdang 7:00 ako nungi tenzüker nikongtsütsü 4:00 ako nung tembangtsü. Külen polling station 309 nung ghonda ka tejakdang tembangtsü. Maneni all women polling teams 253 lapoktsü aser Wokha district kübok polling station ana nung differently abled polling personnel temi ketdangsütsü, ta Abhijit Sinha-isa metetdaktsü.
Polling station 225 nung live web screening aser külen 257 nung offline videography alitsü ta paisa ashi.
Nagaland nung vote agütsür teimba aliba polling station ji 4-Ghaspani-I Assembly Constituency kübok PS No. 58 lir aser nisung ishiba aliba polling station ji 60-Pungro-Kiphire A/C kübok Kiuro yimtsüng nung lir. Iba yimtsüng nung vote agütsür ajak agi parnok 33 lir, ta CEO-isa shisem.
Polling station tem dangi EVMs 3196 aser VVPAT machine 3075 tashi bener yokogo aser Election Commission-i general observer aser expenditure observer anana den police observer ka mapa lemzükja lir. Maneni asüng parnok nisung 11 arutsü, ta paisa ashi.
Nagaland Commissioner & Returning Officer, M Patton-ia ashiba agi, Nagaland nung by-election agitsü atema law & order tensa shitak dang lir.
Nüboyimba mapang RO indang office tsüngdang party anaprong nungi ken o tem benoka lir, ajisüaka ken o-i nüngdakba ama police nem agütsüogo aser parnoki bushisüngdang südar, ta paisa ashi.
Urban Development Minister, Metsubo Jamir-i PDA candidate Tokheho Yepthomi yari nungbo sen agütsütsü ta tai tongloktsüba ken o ka benoka lir. Iba atema Minister nem show cause notice ka agütsü saka pai tezüluba nung iba onükji magizüker ta ashi. Ano külen, NPF candidate C Apok Jamir-i Dimapur nung telok ka nem Mithun agütsü ta Commissioner of Police Dimapur ajanga ken o ka benok, saka pai osangkakettem nung iba onük magizüker ta metetdaktsüogo, ta M Patton-isa ashi.
Nüboyimba mapang tenzükba nungi yashi tashi nung ketdangsertemi sen 84,000 aser yi litre 8829 tashi puogo, ta paisa shisem.
May 28 nü Lok Sabha indang by-election ji agitsü aser May 31 nü votes azüngtsü.
Booth Level Officers-i Voter’s Slip alemer saka ibaji polling anogo nung kechi südir alitsüla ta ozüng kecha mali. Voter’s Slip maliyonga Election Commission-i pei maitsü kuli sayutsü atema tanga kulikakettem amshitsü tetuyuba agütsüogo. Vote agütsür noklang nung shilem 95-i EPIC nung züngsema lir, anungji kuli atema ibaji amshitsü akok, ta Nagaland CEO-isa metetdaktsü.