Nagaland nung medical infrastructure tajungba akümer

Dimapur, April 6 (TYO): Nagaland nung Department of Health & Family Welfare-i tesem ajungalen medical infrastructure tajungba kümdaktsü atema mapa inyaker, ta tanü COVID-19 atema State Spokesperson & Minister, Neiba Kronu-i ashi,
“COVID-19 mozü ki balala nung yipden ajak agi 489 kümogo aser state ajunga atema Personal Protection Equipments (PPEs) 23,000 jungogo. Ano, N95 masks 44,051 tashi aliogo aser itemji district balala nem lema agütsür,” ta Neiba Kronu-i metetdaktsü.
Taruba hoptatem nung ano medical equipment talila bener arutsü. H&FW Department-isa COVID-19 agi shirangertem anepalutsü atema ventilator 70 tashi alizükogo aser 300 alitsü tebilemba lir, ta paisa ashi.
“Nizamuddin, New Delhi nung agiba sentong nung adenertem maneni bushidar aser iba sentong nung adener kar dang Nagaland nung lira, 0370 2291120, 2291122 ajanga State Level Control Room on COVID-19 nem osang sangoktsütsü mepishir” ta Kronu-isa metetdaktsüogo.
Maneni, public-ia iba tamangba yimsü nung adenertem bushiba mapa nung yariteptsü mepishir, ta paisa shisem.
“Anogo asem tejakdang Dimapur nung Doctor ka dak atalokba atema sorkari kanga sasa bilemer. Iba tatalokba atema bushisüngdang südar aser tapet mapa inyaktsü ta ni nangzüker. Nagaland nung medical wadang nung inyaker ajak dang iba tatalokba ajanga tezü matangtsü saka maneni COVID-19 anema tangatetba tajung aser tejangraba nung inyaktsü ayongzüker” ta Kronu-isa ashi.
Hombar nikongtsütsü 5:00 ako tashi nung Nagaland nungi sample 60 tendangtsü atema bener yokogo aser sample 47 ‘negative’ ta bushitetba osang nguogo aser sample 13 indang osang ano mangu lir, ta Minister Kronu-isa ashi.
Nisung 5,040 tashi ncovid-19 Nagaland App nung tenüng züluokogo aser parnok rongnungi nisung 3570-i osang tejangja agütsüogo saka 1470-i ano magütsü lir. Anungji, March 6, 2020 sülen tangalen nungi arur ajaki iba App nung osang tejangja agütsütsü maneni mepishir, ta paisa ashi.
District ajunga nung jangotsü, mozü, totzü aser tongtipang nüngdakbatem indang osang anogoshia metetpelar aser tang tashi nung district ajak peria aliba osang angazükogo, ta Kronu-isa shisem.
Tanü Chief Minister Neiphiu Rio-i Directorate of Health & Family Welfare, Kohima nung Covid-19 control room aser ano State Emergency Operation Centre, Kohima nung State Level Control Room for COVID -19 semdangogo.
Iba mapang CM rio-i ketdangsertem aser staff dang COVID-19 azüoktsü atema mapa tajungtiba inyaktsü atema ayongzüka liasü, ta Minister Kronu-i ashi.
Maneni, Principal Director, Health & Family Welfare-i anir telok kati tanü Jalukie CHC aser COVID-19 Hospital, Dimapur semdanga, medical nisungtem, administration, lennirtem aser tangartem den ajurutepa sensaksogo, ta paisa shisem.
“Nagaland nung telok balala lennirtem aser Civil Society teloktemi tesem balala nung District Administration aser Police den yaritepba atema kanga pelar aser maneni tenokdangba agütsüba sülen anidakba ajanga Novel Coronavirus anema rara nung takok angutsü,” ta Minister Kronu-isa nenshia metetdaktsü.

COVID-19 OSANG
Nagaland 5:00 PM, 6 April 2020

A) Screening Status:

April 6, 2020 tashi nung screen asüba: 1260
April 6, 2020 tashi nung district balala nung screening asüba

1. Sample Testing status:
2. Tendangtsü atema sample yokba                 : 60
3. April 6, 2020 nikongtsütsü 5:00 ako tashi nung sample yokba : 13
4. Osang aruba                                                     : 47
5. Positive putetba                                              : 0
6. Negative putetba                                            : 47
7. Osang ano manguba                                     : 13