Nagaland nung meimchir temeten atema o toktep

Kohima, October 4 (TYO) : SP Office Conference Hall, Kohima nung district pungu nungi police tem adenshia Range Level Debate Competition 2016 agiba nung L. Thungchamo Mozhui (Probationer) Kohima-i mezüngbuba jenjang takok angu.
Iba tetoktepba atema onükji “No human rights violations in Nagaland by Police and Security Forces” liasü aser L. Thungchamo-i ‘against the motion’ jembi.
Tetoktepba nung 10th NAP IR Battalion nungi ABSI Zuchithung-i tanabuba jenjang aser DEF Zunheboto nungi UBSI Anato Yeptho-i tasembuba jenjang takoktem angu. Tenapronglai motion atema jembi.
Ano, 9th NAP IR Bn nungi Hav. Imwati, DEF Phek nungi UBI Medosa Yoho aser 10th NAP IR Bn nungi Naik Zhekishe nunger nem consolations prize tem agütsü.
Tanü Kohima, Phek, Zunheboto, Wokha aser Peren district tem nungi police tem adenshia tetoktepba nung shilem agi aser takokertemi taruba ita state level debate competition nung shilem agitsü.
Tanü onük pusema jembirtemi ashiba agi, police aser security force temji ozüng raksartem masü saka ozüng alema inyakertem nungi nübor kümzükertem lir.
Nagaland nung meimchir temeten jenjang junga lir aser linük nung tanga tesemtem den medemdangra, Nagaland nung meimchir temeten asadangbaji 55.1% junga lir ta onük pusema jembirtemi metetdaktsü. Parnokisa ashiba agi, police-i meimchir temeten anema inyaksangsangshir ta jembibaji olulu aser osang belensaa jembiba dang lir.
Ano külen, onük anema jembirtemi ashiba agi, police aser security force temi aiben meimchir temeten anema inyakogo aser tatalokba kar nung tepuokdak ayurtema reshikangshi asüdang taküm samatsüba dena lir.
Nagaland nung meimchir temeten shitak manguba agi Naga Peoples’ Movement for Human Right tenteta liaka, ano State Human Rights Commission tentettsüsa aküm, ta parnokisa ashi.
Onük anema jembirtemisa March 5, 2015 nü Dimapur nung tetsür tashiyim agi tai tongloktsür ka tepsetba, Assam Rifles-i Wuzu nung tila tanur ana kahsetba aser tetsür ka yirutsüba tatalokbatem atishia jembi.
Police aser security force temi nisung kati aibelenba meputet tashi pa/la ji tai maketer ka ama züngshitsüla aser aibelenba putetba sülena pa/la okatsür teyari agitsü atema maongka agütsütsüla. Ajisüaka, Nagaland state nung yamaji meinyaker, anungji police aser security force temi public nem temulung lemtetdaktsütsü atema ozüng shitak inyaka sayutsüla, ta onük anema jembirtemisa metetdaktsü.
Tanü sentong nung mendenji SDPO (South) Atu Zumvü liasü aser Additional SP Igwangheing Hemang-i okila jembi.
O toktepba nung tetendangertemji SP (Special Branch), Narola Sophie aser Senior Journalist Narayan Bahadur na liasü.