Nagaland nung mezüngbuba LED village ji Fakim

Kohima, March 27 (TYO) : Nagaland nung mezüngbuba Light Emitting Diode, LED Light Village ji Fakim yimtsüng lir aser iba yimtsüng ya Kiphire district nung Pungro Sub-Division kübok lir.
Deobarnü Fakim yimdak Easter tekülem sentong nung adenba sülen Kiphire Deputy Commissioner, Chumremo Odyuo-i iba osang metetdaktsü.
Iba sentong agiba sülen yimdaklirtemi DC nem 100 watt tungsten bulbs agütsü aser iba melena parnoki 15 watt LED bulbs angu. Iba sülen Fakim nem Nagaland nung mezüngbuba LED Village tenüng jaloktsü.
LED bulb den Solar lamp amshiba ajanga electricity noklang nung shilem 90 shi kümzüktsü aser iba asoshi village council-i Electricity Department Junior Engineer, Daniel Yimchunger nem community electricity bill nung concession asütsü atema tezüluba ka agütsü.
Ano, Deobarnü Range Forest Officer Lansothung Lotha, aser Forest guard John Yimchunger nati Thanamir aser Vongtsuvong nung Easter sentongtem nung shilem agi aser iba mapang tenatia kilen shia nem solar charged lamp lema agütsü.