Nagaland nung mezüngbuba OST Camp Changtongya nung agidagi

OST Camp Ketdangsertem, Doctors & Nurses aser Treatment agirtem noksa nung angur.

Changtongya, February 14, 2019: 2013 nungi Nagaland nung mozü achirtem (drug users) asoshi OST (Opioid Substitution Treatment) centre lapokyonga arudagi. Tang tashi nung OST centre 31 lapoker Nagalima tesem balala nung mozü achirtem nem treatment agütsüa arur.
Community Health Centre Changtongya nung 28th October 2013 anogo OST Centre lapoker inyaka arur aser tanü Nagaland nung mezüngbuba OST Camp ka NSACS, Project Sunrise Foundation aser Grace Society Changtongya ta telok asem longjemer achaayanga 13th- 15th February agidagi. Iba Sentong nung Dr. Temsuyanger Ao, ZLO, Nodal Officer DMHP and Technical Expert OST, Dr. Sentikumla Longkumer, O.S.T M.O District Hospital Longleng aser Dr. Imlinaro, SMO CHC Tuli ta parnok asemi mozü achirtem anepaludagi.
Dr. Sentikumla-i ashiba agi mezüng anogo nung mozü achir 63-i arua treatment tenzük aser tanü iba osangbener ajuruba mapang tashi nung ano nisung 14 arua treatment tenzüker liasü. Iba treatment ya anogoshia CHC-i arutettsüpur nem dang agütsür.
Dr. Temsuyanger Ao-i ashiba agi OST agiba tajangzükji iba treatment ajanga illegal drugs chia aliba nungi legal drugs-i meyipdaktsür, rongsen aser mapang kümzüker aser HIV aser Hepatitis tashidak nungia kümzükteter. Iba den parnoki lokti den külemi pongsema aotsü lenmang sadema lapoktsür aser tanem tanemi senso tajung kaka kümteter. Paisa ashiba agi iba OST Camp agiba ya Nagaland nung taoba mapang khen danga ayongzüka agia mali ta maneni metetdakja liasü.