Nagaland nung MGNREGA nung inyakertem mener lungkak ait

Kohima, July 15 (TYO): Tanü Nagaland nung Mahatma Gandhi National Rural Employment Guarantee Act (MGNREGA) kübok inyaker nisung 500 shi mener lungkak aita job security aser iba scheme asoshi department balaka kümjang, ta takhangba agüja liasü.
Tanü Kohima nung State Civil Secretariat kima Nagaland MGNREGA Employees Association züngsemtemi ozülu balala amer parnoki akhangba onük asemji atalokjang ta lungkak aitogo.
Iba lungkak aitba sentong ya North East MGNREGA Employees Association (NEMEA)-i tuyuba nung ajemdaker ayongzük, ta Nagaland MGNREGA Association Tir, Mathew Yhome-i metetdaktsü.
“Onok temetentem aser mapa security asoshi onoki noktaker, kechiyong iba Act kübok yimtak alirtem aser yimtsüng nung alirtem tajangzük angur saka employees asoshibo job security mali,” ta Tiri ashi.
Onük asem nung takhangba metetdakja Yhome-i, “Linük nung aliba MGNREGA employees ajak itasen liromedemtsü aser inyakyim junga lateta onok mapa nung regularize sütsütsü atema onoki akhanger, ibaji Centre sorkari inyaktsüla,” ta ashi.
Tanabuba takhangbaji tanga sorkar service balala den liromedema onok nema maongka balala agütsütsüla, ta paisa ashi.
Onokisa India sorkar, Ministry of Rural Department kübok MGNREGA atema department balaka kümtettsü asoshi akhanger, ta Yhome-i ashi.
“Centre aser state sorkar napronglai MGNREGA nung inyakertem ya lajartem ama züngshir,” ta pai ashi.
Rural Development Minister, Nagaland nem agütsüba shidi nung Association-i, “2006 küm nungi tenzüka MGNREGA kübok onoki junga tenzüka aruogo. Onoki temelung ajak agi nendaka mapa inyakogo aser onok nem lemzüktsüba mapa nung onoki technical mesüra non-technical support ajanga junga inyaktetogo,” ta ashi.
Minister dang parnoki akhangba onük asem metetdakja Association-i, parnok mapa aser kibong tarutsü tia kümzüktsü asoshi tekaraba nung mera agidaktsüner ta minister dang mepishiogo.