Nagaland nung MGNREGA sen tim mesüi amshiba bushisüngdangtsü akhanger

May 20, 2016 nü Kohima, Raj Bhavan nung NPCC Tir, K Therie den Party lennirtem aser party nung inyakertem longkak aitdang agiba noksa angur. 

Kohima, May 20 (TYO): Mahatma Gandhi National Rural Employment Guarantee Act (MGNREGA) fund tim mesüi amshiba anema Hokolbarnü Nagaland nung Congress züngsemtemi mener longkak aitba sentong ka agiogo.
MGNREGA dak sendakba maparen tim mesüi inyakba bushisüngdangtsü atema enquiry commission ka tentetang ta takhangba agüja Congress züngsemtemi longkak ait.
Raj Bhavan, Kohima kima nung Nagaland Pradesh Congress Committee (NPCC)-i longkak aitba sentong ayongzüka agi aser iba mapang parnoki Angh nem tezüluba nung takhangba ka agütsü. Kasa mapang nung District Congress Committee temia district 11 nung Deputy Commissioner tem nem tezüluba agütsü.
High Court Judge ka lenisüba nung enquiry commission ka tentettsü, aser iba telok jagi Nagaland nung MGNREGA dak sendakba ken o tem bushisüngdangtsü takhangba agütsü.
Tanü Angh maliba agi NPCC-i Secretary to Governor nem tezüluba agütsü.
NPCC President, K Therie-i ashiba agi, “Yimtsüng tia nung alirtem nem küm shia anogo 100 mapa inyakba taa agütsütsü atema küm 10 tejakdang taoba Prime Minister Dr Manmohan Singh aser Congress President Sonia Gandhi nati MGNREGA scheme tenzüktsü.”
“Küm 10 tsüngda Naga People’s Front (NPF)-i aniba Democratic Alliance of Nagaland sorkari MGNREGA tiptema inyaktsü melena ochimashi agi süngdaktsüogo,” ta Therie-isa ashi.
“MGNREGA indang senotsü aruba tesadang ka state sorkari MLA discretion fund ta tim mesüi amshir aser iba senji Minister aser MLA temi parnok amshinütsü amshir. 2015-16 mapang working days 3 liasü ta state sorkari kuli agütsü saka sen crore 199.74 agizük. Süra, anogo asemnü atema dang taa agütsü süra, tanüngba senji kongi ao?” ta K Therie-isa asüngdang.
“Taküm April ita tashi nung MGNREGA kübok Nagaland nem sen crore 442.32 agütsüogo saka job card holders nem sen magütsü. Council of Ministers, Parliamentary Secretaries, MLAs, Government employees aser contractors kar rongnung crore 10000 state budget samaba dang masü saka parnoki sensakertem asoshi agütsüba MGNREGA sena achitsü meranger,” ta paisa aitsü.
“Nagaland nung aliba nübortem asoshi onoki noktaker aser onoki ochimashi magizüker. State sorkari Act indang telatetbatem anema inyakogo, anungji state sorkari job cards lema magütsütsü tashi, anogo 100 taa magütsü tashi aser timtem kecha melii MGNREGA maparen shitak meinyak tashi, onoki iba onük atema maneni takhangba agütsütsü,” ta NPPC President-isa metetdaktsü.
Anogo 30 tsüngda Angh-i Commission ka metentetra, Congress Party-i iba onük ya okadak benoktsü, ta paisa shisem.
Sentong nung NPCC Working President, Ayangba Aonok-ia o jembidang, “Congress-i aniba UPA sorkari iba scheme tenzüktsü saka Nagaland nungbo state sorkari sensakertem atema aria mebilemtsüi senotsü tim mesüi amshir,” ta ashi.
Takhangbatem asoshi telangzüba mongura Congress-i iba onük ya okadaki abentsü, ta Ayangba Aonok-isa shisem.
NPCC vice president, Khriedi Theünuo-ia ashiba agi, “Küm 10 tema iba scheme inyaka arur saka nübortem ket matonger. Iba jagi district ajak nung nübortem nem Act tim mesüi amshiba jungkai adoka sayutsü atema iba longkak aitba sentong ayongzüka agir.”