Nagaland nung mijang atuba nungi sorkar senpongi sen shitak arutsüla

Dimapur, Nov.09 (TYO) : Nagaland nung ali rongsen agiteta amshiba nungi alimelen shitak arutsü asoshi state sorkari inyakyim shitak lateta inyaktsü melen, mulungtet telok katiang sorkar dang saru mashimashi mesarui shitak challan amshia inyaktsüla ta metetdaktsüogo.
Iba tangatetba ken o ya taoba hopta November 4 nü Dimapur nung Nagaland Coal Mining & Marketing Welafare Society purtem senden aliba mapang benoka jembir telemtetba takang ka sorkar nem agütsütsü lemtetogo.
Iba senden nung Nagaland nung mijang tua ayokba maparen nungi sorkar senpongi sen junga maitsüsa challan mashi amshia sen saruba tebilemtsü benoka jembir külen, tang nungibo mijang abenba mapa ya license shitak alirtemi dang inyaktsü aser mijang bener aotsü asoshi Treasury Challan ajanga dang sorkar nem saru agütsütsü aliba agütsür anguba T.P ajanga dang abentsü, anungji tang nungi Geology & Mining Department nung ketdangsertemi ‘temporary challan’ amshia saru meshibaji anenadoktsüla ta iba mulungtet telokisa metetdaktsü.
Aji oda, challan aser tanga nüngdakba kakettem kechisa Nagaland sorkari agütsüdir, itemji tanga state nunga agizüktettsüsa agütsütsüla ta parnokisa metetdaktsü.
Ano, Meghalaya nung mijang aturtem dang nungi central excise duty saru memeshitsüsa inyaktsüba amaji Nagaland sorkaria inyaktsüla ta kasa telokisa metetdaktsü.
Nagaland nung mijang atur aser ayokertem telongjem senden nung ya Wb.T.N.Mannen IAS (Rtd) menden liasü aser Mon, Longleng, Tuensang, Wokha aser Mokokchung district-tem nungi züngsem medemmedema arua dena liasü.
Iba senden nungsa mijang atuba district shia nung Sub-Unit office kaka lapoktsü nüngdakba indang jembia liasü.