Nagaland nung moko achir mali kümdaktsüdi

Kohima, April 26 (TYO): Kohima nung tanü Directorate of Health & Family Welfare nung departmental law enforcement ketdangsertem atema moko nokdangtsü asoshi state level advocacy workshop alidang Nagaland nung longjemer moko nokdangtsü aser Tobacco control Act junga benoktsü atema jembiogo.
Iba sentong nung jembidang  Chief secretary, Pankaj Kumar-i nisung ajaki moko anema raratsü atema ayongzüka, “Moko achiba ajanga timtem balala indang nüburtemi memetet tashi Act ka agizükba ajanga dangbo moko menokdangtettsü,” ta metetdaktsü.
Iba atema mulungtet teloktem (NGOs) aser lokti tentet ajaki nüburtem nem awareness programme ayongzüka katsütsüla, ta pai ayongzük.
Paisa, shisaliok rejutemi pei reju temeket kübok yard 100 ji moko maliba zone kümdaktsütsüla, kechiyong moko achir timbaka arishi küm 15 nungi 24 tsüngdapurtem lir, ta ashi.
Health & family welfare principal director, Dr. Sukhato A Sema-ia, FCTC treaty nung India ya sign asür tongti lir, aser ibaji ajanga Parliament nung COTPA 2003 ozüng benok, ta ashi.
FCTC treaty partners nung tang linük 180 lir.
Dr. Sema-isa, state level advocacy workshop ayongzükba ya departmental ozüng benoker ketdangsertem nem moko azüokba ozüngtem (COTPA 2003, Cigarettes & Other Tobacco Product Act) angatetdaktsütsü atema lir, ta ashi.
Alima nung moko ajanga kümshia nisung million  5.4 tepseter.
Paisa, India nung moko achiba ajanga anogoshia nisung 2200 dak tema asür. Alima nung oral cancer agi shiranger timtibaji India lir aser oral cancer shilem 90 bo moko achiba den sentaktepa lir, ta metetdaktsü.
Paisa ashiba agi, Nagaland School Oral Health Survey- 2014 nung ajemdaker, (arishi küm 8-13 mesüra class 3 nungi 8) mokozü madokba moko achirtem shilem 28.3, moko meseper shilem 14.8 aser tsüraburtem atema moko alitsür tanur shilem 41.2 lir.
Directorate of Health & Family Welfare Dental & State Nodal Officer NTCP Joint Director, Dr. H. Hotokhu Chishi-ia, alima nung moko meseper billion 1 lir aser item rongnung tetsür shilem 20 lir, ta ashi.
Nagaland nung moko dak sentakba referral cases (Oral Cancer) dak sentakba nung Dr. Chishi-i, küm asem tsüngda (2007,  2008 aser 2009) moko dak sentakba pre-cancerous case ajak agi 234 liasü aser moko dak sentakba cancer 155 jangjaogo, ta metetdaktsü.
Tanü iba sentong ya Health & family welfare secretary, Senti Ao leniba nung agi aser NHM MD, Dr. Yankho Lotha-i tepela o jembi.
NAGALAND NUNG MOKO ACHIBA OSANG:
* Moko achir shilem 57
*    Tebur moko achir shilem 68
*    Tetsür moko achir shilem 28
*    School tanur moko meseper shilem 37
*    School tanur moko mesEper tebur shilem 55
*    School tanur moko meseper tetsür shilem  18
*    School tanur moko achir shilem 41
*    School tanur moko achir tebur shilem 50
*    School tanur moko achir tetsür shilem 33 lir (Source: Global School Personal Survey (GSPS) 2003.