Nagaland nung moko achirtem kanga ajemogo: Dr. Arenla

Kohima, Monupii/May 31 (TYO): Statistics nung ajemdaker District Nodal Officer, NTCP Kohima, Dr. Arenla Walling-i, Nagaland nung moko achiba kanga ajema kümogo, ta metetdaktsü.
Tanü Kohima nung “Tobacco and heart diseases,” omen nung ajemdaker World No Tobacco Day 2018 anogomong sentong nung jembidang lai, tawa Global Adult Tobacco Survey (GATS)-i agiba survey nung linük nung moko achir timtiba aliba tanabuba jenjang nung Nagaland (shilem 56.8%) kanga tajungba küma Northeast nung jenjang 7buba (43.3%) aser linük nung jenjang 8buba kümogo, ta metetdaktsü.
Nagaland nung mokozü adokdakja achiba temesepba moko achir shilem 31.5 aliba nungi shilem 13.2 aser temejakba moko achir shilem 45.37 aliba nungi 39 kümogo.
Pan masala achir timtibaji Nagaland lir (shilem 21); tebur shilem 24 aser tetsür shilem 18-i pan masala achir, ta kasa osang ajanga metetdaktsü.
Kohima nung World No Tobacco Day mapatong dak sendakba nung lai, Kohima Deputy Commissioner aser District Level Coordination Committee (DLCC) Chairman-i iba anogomong tenüng nung tanü Kohima nung moko ayokba nokdanga liasü, ta metetdaktsü.
Kasa anogomong nüngtem nung Kohima District Legal Services Authority (DLSA)-i walkathon ayongzüka agi, school asem nung anti-tobacco Slogan tetoktepba agi, enforcement team troki (North & South Block) COTPA 2003 kübok mita ao aser Tobacco Free Educational institutes ajak nung iba anogomong sentong ayonga agiogo.
District Tobacco Control Cell (DTCC) Kohima-i school, college aser Institutes balala nung “Harmful effects of tobacco & COTPA 2003” indang awareness sentong 224 agiogo. Parnokisa school balala nung otsüno zülutepba, painting aser slogan tetoktepba 12 ben ayonga agiba den tesayurtem, Health Workers, Enforcement Officers, dokan amenertem, Hotel managers, Head of Educational Institutes aser GBs nem training 45 ayongzüka katsüogo.
Iba dak alia Arogotem, fellowships, vacation Bible schools aser youth camps nung community sensitization programme 17 ayongzüka katsüogo.
Kasa sentong nung Dr. Vanlalruati Nyuthe aser state nodal officer NCD, Dr. Nchumbemo Ezung natia jembia liasü.
Tang Nagaland nung moko achiba jenjang
* Moko balala achirtem : 45.3%
* Mokozü adoka achiba moko achirtem : 4.3 %
* Moko tapu anaprong achirtem : 8.9%
* Temejakba/mangemba moko achirtem: 30.1 %
* Moko machirtem : 56.7 %
* Moko achir teburtem : 54%
* Moko achir tetsürtem : 32%
* Pan masala den moko achirtem : 21.17 %
* Pan nung moko densema achirtem : 17.5 %
* Khaini/sata achirtem : 10.1%
* Biri/Bidi achirtem : 9.9 %
* Gutkha achirtem : 9.4%