Nagaland nung National Education Day among

Kohima, November 11 (TYO): Hokolbarnü linük den tsüngkang medema Nagaland nunga Kohima nung National Education Day anogomong mongogo.
Nagaland nung Education degree alirtemi Ura College of Teacher Education nung iba sentong ayongzüka among.
Iba sentong nung okila jembidang Dr. Zavise Rume-i, National Education Day ya India nung mezüngbuba Education Minister, Maulana Abul Kalam Azad nüngtem nung pa asoba anogo nung amonger; pai August 15, 1947 nungi February 2, 1958 tashi minister inyaka liasü, ta metetdaktsü.
National Education Day ya kümshia November 11 nü amonger.
National Education Day amongba ya shisaliok rejutem tashi idaktsütsü aser shisaliok nung jenjang tasen atongtsü nükjidong nung amonger.
Iba anogomong nung India nüjiso anguba sülen shisaliok jenjang yangerba nung shilem agisang Maulana Azad bilemtettsü atema sabang agütsür, iba den külemi iba sentong ya shisaliok jenjang asadangtsü atema lir.
‘Educare’ teratet metetdakja Christ King Church Kohima village, Parish Priest, SDB, (Dr) Fr. Peter Salew-i, ‘educare’ tetezü anitetba, ajungkettsüba, anepalua sayutetba lir, ta ashi.
Paisa, “Tesayur kati tanur kaji atsü nung süngdong ka indaktsüba ama intetdaktsütsüla. Pa dak aliba tashitemji kanga junga anepalu arangshitsütsüla,” ta ashi.
Paisa, educare-i tanurtemi pei dak aketba tashi tajungtiba nung bushiteta taküm nung takok ngudaktsütsü atema youth development programmes agütsür, ta ashi.
Africa lenir, Nelson Mandela-i jembiba o lepshia pai, “Raraba hadir tashi taittibaji shisaliok lir, aser alima melenshitsü atema nai ibaji amshitettsü,” ta ashi.
Kasa sentong nung (Retd) state project director SSA, John Lohe-ia tesayurtem dang shisaliok nung temelenshi adokdaktsür ka ka asütsü ayongzük.
Paisa, shisaliok sentongji tera nungi tenzüktsüla aser primary level nunga rangloker inyaktsüla, ta ashi.
Asstt. Professor, State College of Teacher Education, Achila-i sarasadema sentong tenzük, Asstt. Professor, Ura College of Teacher Education, Vitseituonuo Ciesotsu-i lokti pelaa agizük aser Asstt. Professor, Ura College of Teacher Education, Markangla Jamir-i tepela anküp o jembia liasü.