Nagaland nung ‘National Girl Child’ anogomong among

Aenjeti 24, 2018 nü T Khek, Kohima Village nung ‘National Gilrd Child’ anogomong sentong nung NSSWB Chairperson, Bano Vinito-i jembiba ajichilen noksa nung angur, aser abelen noksa nung kasa sentong nung shilem agia adener tetsür chanu kar angur. 

Kohima, Aenjeti (January) 24 (TYO): Linük tesem ajak den külemi tanü Nagaland nunga ‘A skilled generation: An independent generation’ omen nung ajemdaker ‘National Girl Child Day’ anogomong ayonga mongogo.
State Resource Centre for Women (SCRW) den Nagaland State Social Welfare Board (NSSWB) aser Entrepreneur Development & Integrated Training Institute (EDITI) senteper skill development workshop ka agia iba anogomong among.
Tsutuonuomia (T Khel) Community Hall, Kohima village nung parnoki tetsürtem nem special skill development training agüja kou mejeptsü, kazütsü (doll) yanglutsü, naro yanglutsü aser sentiosettem (jewellery) yanglutsü training agüja liasü. Iba sentong nung tetsür chanu 100 shi shilem agia aden.
NSSWB Chairperson, Bano Vinito-i, iba anogomong ya linük nung tetsür chanutem nungittsü aser maongka tasen balala agütsütsü nükjidong nung tenzüka liasü, ta metetdaktsü.
Laisa, iba anogomong ya loktiliba nung tetsür chanutem nem kasa maongka magütsüba indang nüburtem nem taliba angateta kümdaktsütsü atema amonger, ta metetdaktsü.
Tetsür chanutem dang lai, “Tetoktepba lima ka nung alir asünung pei jenjang ajungkettsü atema shisaliok bushitsüla. Nenoki teka mapa balala angazüktsüla, aser ibaji sorakri benokba skill development programme balala ajanga angutsü. Iba den külemi Naga nunger sü atakba sobaliba mamadoktsüla,” ta ajungshia metetdaktsü.
Item ama teka mapa balala shia aliba ajanga rongsenkettsng jenjang ajungtsü, ta laisa shisem.
Kasa sentong nung Jitsiasa Nyuthe-i timtem-lendong ajurur tetsür tem aser tetsür chanutemi toll free number 181 aser One Stop Centre scheme ajanga teyari bushitsü iba den külemi tetsür chanutem helpline atema toll free number 1098 tem indang metetdaktsü.
State Coordinator SRCW, M Juliana Medom aser Neinguvotuonuo nati Centre sorkari linük nung tetsür chanutem kümzüktsü aser tetsür chanutem nem shisaliok agütsütsü nükjidong nung benokba ‘Beti Bachao Beto Padhao’ scheme aser EDITI indang rateta metetdakja liasü.
State Coordinator SRCW, Gracy Ayee leniba iba sentong agi aser Khedi Baptist Church nung Associate Pastor (Women), Ruokuovinuo Noudi-i sarasadema liasü.