Nagaland nung ‘National Press Day’ among

National Press Day sentong nung Morung Express Yimozülur Dr. Akum Longchari-i  jembiba noksa nung angur. (Dimapur, Nov. 16, 2016)

Dimapur, Nov.16 (TYO): November 16 ya India nung ‘National Press Day’ lir aser linük ajunga den külemi Nagaland nunga Bodbar nü osangbenertemi iba sentong ya Dimapur nung ayongzüka mongogo.
Iba sentong ya Elim Hall, DABA office building nung Kohima, Dimapur aser Mokokchung Press Club purtemi DIPR teyari agia ayongzüka liasü.
Iba anogomong sentong omen “Professional ethics in Journalism” nung tongti o jembir, Morung Express nung yimozülur, Dr. Akum Longchari-i jembidang, osangtsüsang abenba mapa ya pei asoshi inyakba mapa ka masü saka loktiliba tenzükba mapa ka lir aser iba mapa nung osangbener shiai pei temeten aser teinyaktsü mapa meteta inyaktsübaji democracy nung kanga tongtibang shilem lir ta metetdaktsü.
“Osangbenertemi shitak dang masü saka ochi bushitsüla aser osangtsüsang bendena yangludang ajak shitak aser ochi asütsüsa kanga junga bushidanga aser asüngdangtepa yanglutsüla,” ta Dr. Akum Longcharisa metetdaktsü.
Paisa külem osangzülurtem dang osangtsüsang renema prokshiba maparen tajungba küma inyaktsü asoshi shinga tsütsü atsünga masü saka kechi shitak aser kechi ochi, idakji amendaker inyaktsüla, ta ayongzük.
Tanü ama Nagaland nung ajak teraksa tia nung alidang, osangbenertem mapaji kechi asütsü ta Dr.Akümisa tayongzükba ka agütsü. “Tang ya Nagaland nung ochi ajemokja lir, taochi tenük tapok kümogo, ochiobendanga tangari rakzüka bener ogo aser yimjung angutsü tasak kümogo, iba ama tensa tia ka nung asenoka teinyaktsü shilem kechi asütsü,” ta Aküm Longcharisa metetdaktsü.
Iba sentong nung Director IPR, Wb.Limawati-i jembidang, Nagaland nung osangbenertemi meranga inyakba ngua pelaba metetdaktsü. Tang state nung adokba osangkakettem dang nungibo Nagaland nung adokba osangkakettem nung osangtsüsang teimba alir ta paisa Nagaland nung adokba osangkakettem nüng sanga metetdaktsü.
Paisa tawa Nagaland government-i Nagaland Journalists’ Welfare Scheme tentettsüba osang metetdaktsü.
Iba kasa sentong nung National Press Day salem agüja jembirtemji, Nagaland Page yimozülur, Monalisa; Eastern Mirror yimozülur, Wb. K.Wapong Longkumer aser Tir Yimyim yimozülur, Wb. K.Temjen Jamir nungertem liasü.
Iba sentong lapoka DABA Youth Director, Jongshimaneni sarasadem aser Seyiekietuo Keretsu-i ken tajung ka aten. Iba senden nung menden Dimapur Press Club nung tongti zülur, S.Henlly Phom menden liasü aser Kohima Press Club tir Wb. Xavier Rutsa-i tatemsa shilem agirtem aser yaritepertem ajak dang pelaba o metetdaktsü.