Nagaland nung nisung 122 dak COVID-19 putetogo

Kohima, June 8 (TYO): Nagaland nung Hombarnü nisung 5 dak COVID-19 putetogo aser parnok züngsema nisung ajak agi 122 kümogo.
“Temulung melemi bilemba sample 220 tendangdang 5 positive putet” ta Health & Family Welfare Minister, S Pangnyu Phom-i ashi.
“Tanü putetertemji Dimapur Quarantine center nungi 2 aser Kohima nungi 3 lir” ta paisa ashi.
“Tanü putetertem rongnung Haryana nungi arur nisung 3 aser Chennai nungi arur nisung 2 lir” ta Health department ketdangsertemi metetdaktsü.
Tanü COVID War Room Nagaland aser tanga osang kar nung nisung 123 ajungba osangtem prokshi saka H&FW Additional Director-i “nisung ka indang sample anaben- May 30 aser 31 anogotem tendangba ajanga nisung talila ka adoker saka shitakba nungbo nisung 122 dang lir” ta iba osang jangjatsüogo.
Nagaland nung nisung 5,367 tashi Facility Quarantine nung mongdar aser Home Quarantine nung nisung 7,855 lir.
Taonung 9:30 ako meta Gujarat aser Maharashtra nungi nisung 949 tashi Special Train ka ajanga Dimapur atongtsü. Ano, Kerala, Tamil Nadu aser Telangana nung anendaka alirtem asüng apusotsü.
June 8 nü nisung 121 aru: June 8, 2020 nü tangalen nungi nisung 121 tashi Nagaland tongogo. Kolkata nungi nisung 115 aser Guwahati nungi 6 Dimapur tonga aru.
Parnok ajak Airport nung medical screening asüba sülen Nagaland State transport bus garitem ajanga Agri expo-i anir ao aser idak nung jagi quarantine centre balalai yoktsü.
June 7 nü nisung 390 aru: June 7 nüa tangalen nungi nisung 390 tashi Nagaland tongogo. Parnok rongnung Guwahati nungi nisung 27, Delhi aser Dibrugarh nungi 232, Uttar Pradesh nungi 89 aser Jammu & Kashmir nungi 29 lir.
Maneni nija garitem ajanga Guwahati nungi nisung 8 aser Manipur nungi nisung 5 aruogo.
Nagaland nung nisung 122 dak COVID-19 puteta aliba atema district telemsa tsünglanglen agüja lir.