Nagaland nung nisung 2000 tema dak COVID-19 putetogo Aug 3 nü nisung sepai 113 densema nisung 194 dak putet

Kohima, August 3 (TYO): Hombarnü Nagaland nung COVID-19 puteter nisung 2000 tema adenogo. Tanü nisung 194 dak COVID-19 putet aser iba ya nisung timtiba dak putetba lir.
“Sample 845 tendangdang nisung 194 dak COVID-19 putet. Parnokji Dimapur nung 136, Zunheboto nung 36 aser Kohima nung 22 lir” ta Health & Family Welfare Minister, S Pangnyu Phom-i metetdaktsü.
“Parnok ajak isolation nung yuogo aser nisungtem bushitepba maparen tenzükogo. Parnok-i iba virus menaba kuli ngutetogo aser tanü tashi nung Nagaland nung lokti nung menatepa aoba kuli kecha mali” ta Minister Pangnyu-i ashi.
Nagaland nung nisung teimba dak COVID19 putetbaji August 1 nü nisung 134 dak putetba liasü saka tanü nisung 194 dak puteta ibaji ajangtetogo. Tang Nagaland nung COVID-19 puteter nisung 2129 kümogo.
Tanü putetertem rongnung Armed Force nungi nisung 113 dena lir. Parnokji Dimapur nung 71, Kohima nung 6 aser Zunheboto nung 36 lir.
Tanüngba nisungtem rongnung tangalen nungi arur 33 (Dimapur 27 & Kohima 6) aser Dimapur nung frontline workers 23 dena lir. Ano, COVID-19 puteta alirtem den ajurutepertem bushia aodang Dimapur nung nisung 15 aser Kohima nung nisung 9 dak COVID-19 aliba bushitet. Iba nung Assembly aser Raj Bhavan dak sendakba nung nisung ka dena lir.
Maneni, Kohima nung COVID-19 puteta alir nisung 9 tendangdang negative putet aser parnok züngsema taneptsü angur ajak agi 657 kümogo, ta HFW Department Additional Director, Dr Denis Hangsing-i metetdaktsü.
COVID-19 puteta alirtem rongnung nisung 1464 mozü ki balala nung anepaludar, 6 süogo aser ana tangaleni ogo, ta health ketdangser kati ashi.
Nagaland kübok Dimapur district nung nisung timba dak COVID-19 puteta lir. District telemsa yamai lir: Dimapur- 1019, Kohima-534, Peren-252, Mon-149, Zunheboto-66, Tuensang-46, Phek-29, Mokokchung-18, Wokha-13 aser Longleng-3.
Mozü ki balala nung anepaluba nisung 1464 ji Dimapur nung 845, Kohima nung 386, Mon nung 110, Zunheboto nung 61, Peren nung 21, Phek nung 14, Wokha nung 12, Mokokchung nung 11 aser Tuensang nung 4.
Kiphire district nung dang tanü tashi nisung ka dak danga COVID-19 putetba osang mali.
Taneptsü angur nisung 657 ji Peren nungi 231, Dimapur nungi 167, Kohima nungi 147, Tuensang nungi 42, Mon nungi 39, Phek nungi 15, Mokokchung nungi 7, Zunheboto nungi 5, Longleng nungi 3 aser Wokha nungi 1 lir.

Zunheboto nung sepai 36 dak putet:
Hombarnü Zunheboto nungi nisung 36 dak COVID-19 putetbaji BSF sepaitem dang lir aser parnok ajak ya Unit quarantine centre nung amonger, ta Chief Medical Officer, Zunheboto-i ashi.
Zunheboto district nungi nisung 61 dak COVID-19 puteta alirtem rongnung tangalen nungi arur civilian 1 dang lir, ta paisa ashi.
Tanüngba nisung 60 ji BSP sepaitem dang lir aser tensa azüoka lir. Anungji, nisungtemi petsaprong masütsüla aser teti tetuyuba sülen anidaktsü ayongzüker, ta Zunheboto CMO-isa shisem.