Nagaland nung nisung 2,434 tashi pei pei district-i ao

Dimapur, May 7 (TYO): Nagaland Additional Chief Secretary aser Finance Commissioner nati anir Empowered Group-i ketdangsüa nisung aika pei pei district-i ogo.
Tanü Nagaland kübok tesem balala nungi passenger 2,434 tashi bus gari 106 nung pei pei district-i apusoa ao.
Linük ajungalen COVID-19 Nagaland nungi pila orr alir nem state sorkari senotsü teyari agüja arudang, tang tashi nung tenüng agütsür nisung 17,439 indang bank account tem nung sen enoktsüogo. Parnok rongnung mapa inyaker 13,159, kaketshir 4,112 aser shiranger 168 lir, ta Principal Secretary Home, Abhijit Sinha-i ashi.
Tanü tashi Nagaland nungi sample 786 tendangtsü atema bener yokba nungi sample 728 negative ta putetba osang nguogo. Ano sample 58 indang osang mangu lir, ta paisa metetdaktsü.
Brihostibarnü Chief Minister Neiphiu Rio-i Mokokchung aser Wokha semdang aser idangji COVID-19 anema mapa inyakba reprangdang.
Chief Minister-i district anaprong nung COVID hospital tem semdang, relief materials lema agütsü aser District Administration, Police, District Task Force aser Civil Society tem den sendentem amen.
Nagaland Chief Minister-i Mokokchung semdangdang Deputy Chief Minister Y Patton, NLA Speaker Sharingain Longkumer, Higher & Technical and Tribal Affairs Minister Temjen Imna Along, Rural Development Minister Metsubo, Treasuries and Accounts and National Highways Advisor Dr Longrineken aser MLA Imkong L. Imchen nungertemi pa meina liasü.
Wokha semdangdang Deputy Chief Minister, Higher and Technical and Tribal Affairs Minister, aser Rural Development Minister nungertemi pa meina ao.