Nagaland nung nisung 7 arakset; sen crore aika akoksaogo

Kohima, Chiteni (July) 30 (TYO): Nagaland nung tzünglu kanga aruba ajanga tesem balala nung nisung tenet tashi tzü nung arakset aser sen crore aika alang kiojentem raksaba den National Highways densema gari lenmang aika anenbanga lir, ta tanü sorkar osang ka ajanga ashi.
“Taoba hopta ishika tsüngsang mejungi aruba ajanga tesem aika nung lenmang, nija aser sorkar kiojentem raksaogo” ta tanü Chief Secretary Temjen Toy-i osangbener dang ashi.
Tanü Secretariat nung pa indang chamber conference hall nung osangbener den jembidang Temjen Toy-i “tang Kohima aser temeket nung atalokba lendongtem ya süoki ia bilemtsüla aser lenmang den kiojentem raksaba olemteptsü atema tanü rongdak senden ka ayonga amen” ta ashi.
Kohima nung yashi Dzücharü ayong nung tetsü aser jala ka ponger ao aser tang tashi gari lenmang tenet den ki 25 tashi raksaba osang lir, ta Deputy Commissioner, Rajesh Soundarajan-i ashi. Pa ya Kohima District Disaster Management Authority nunga chairman lir.
Yashi lendong atalokba nung tetsü angu aser nija mozü ki ka nung anepaludar aser külen jala mangji tanü State Disaster Rescue Force-i angu, ta paisa ashi.
Tang ya state yimtibai aruba lenmang teimbaka noktanga lir aser iba ya taaktsüka lir. Kohima kübok Dzüvürü anasa Mohonkhola, FCI Godown anasa NH-2 Phesama, Kisama gate, Naga Bazaar, Sanuorü nung Secretariat Road, Seikhazou-BSF camp (Keyake) road, BSF camp-Medical College-Secretariat, NBCC Convention Hall nungi New High Court junction, NH-2 High Court junction nungi IG Stadium tesemtem nung anentsüh ajanga timtemer, ta Chief Secretary-i ashi.
Lendong balala ataloktsüsa ajuruba tensa nung gari lenmang anepalurtem zübazülemba densema lir. Talisa, gari lenmang anepaluba ya sorkar aser department tem indang tebilemtsü dang masü saka sensotem-a dena lir, kechiyong sensotemi mebilemdangi inyakba ajanga kilentzü aolen tangbanger, ta Temjen Toy-isa ashi.
Traffic tiptema sensützü aser tang nüngdakbatem anguba den shisaliok rejutem timtem majurudaktsütsü atema mapa inyaktsüla, ta paisa shisem.
Tang ajuruba tensa ya ’emergency state’ ka lir anungji Kohima nung aser temeket nung aliba technical ketdangser ajak nem mapa lemzüktsütsü. Gari lenmangtem noktanga aliba lapoktsü aser ali anenoka aiba khuret reprangtsü, ta Chief Secretary-isa metetdaktsü.
Tsüngsang majungba atema shisaliok rejutem shibangba atema olen ka ashidang “onoki school education department den iba tebilemtsü reprangshimogo aser tang school tem shibangtsü nüngdak madoker ta bilemer, taonung tashi nung Kohima nung lenmangtem yanglutsü imlar” ta paisa ashi.
Chief Secretary-isa public dang kilentzü ayimdak metangbangtsü atema mepishia metetdaktsü.
Kohima nung alirtemi shisamebulutsüla kechiyong essential commodities peria lir aser shitak bener arutsü atema mapa inyakdar, ta Temjen Toy-isa shisem.
Ano külen, BRO-i Tuensang-Mon district tem sendaktepba NH-702 nung anentsüh tulu ka alua lir ta osang metetdaktsü.
Parnoki lenmang tasen ka atutsü atema mapa inyakdar, ta BRO-isa ashi.
Külen, NSDMA OSD, Johnny Ruangmei-ia ashiba agi, tanü Tuensang district kübok Hukir yimtsüng nung nisung pungu tzü agi ponger ao.
Iba lendong atema search & rescue team-i Zunheboto district kübok Ahunato anasa mang ana angu aser tanüngba nisung asem bushitepdar, ta paisa ashi.