Nagaland nung online payment atema website tasen ka lapok

March 11, 2017 nü Aier Enclave, Dimapur nung onlybafo.com website lapokba sentong nung DABA Pastor, Rev. N. Tzudir, onlybafo.com website kibur, Wati Imsong den par telok aser DABA Youth Director, Jongshimanen nunger külemi tangokba noksa ka angur. 

Dimapur, March 11 (TYO): Honibarnü Aier’s Enclave, Dimapur nung Nagaland nung aliba dokan ajak atema angati online payment facilities asoshi website “onlybafo.com” lapokogo.
Iba mapa tasen purapitetsang ya shishilembar lanur, Wati Imsong lir, aser kishizüng tashi favourite stores bener arutsütsüji pa nükjidong lir. Pai ashiba agi, payments dak alia dokantemi parnok indang products ji website nungji inoktsütsü akok, aser online ajanga-a ayoktsü akok.
Pa Bengaluru nung alidang iba website tenzüktsü atema pai apitet, aser state-i meyipa arudang online services ajema aliba pai reprangteta online services agütsütsü asoshi website ka tenzükba ajanga business kiburtem aser customers naprong ajangzüktsü, ta apiteta iba website tenzük.
Iba ya ajanga shishilembaba tezübaba kümdaktsür. Iba ya ajanga ‘traffic jam’ tebilemtsü paidoktettsü, ATM mesüra cash withdrawal charges magitsü, ajisüaka iba website browse asüba ajanga online payment ajanga shidi sen mamshii shishilembatettsü.
Paisa ashiba agi, iba ya ajanga Naga Artists aser kentenertemi parnok indang music iba website nung inoktsüba ajanga parnok jenjang ajungkettsü. Artist temi parnok indang music ajungkettsütsü asoshi parnok indang mp3 mesüra mp4 den parnok profile ji onlybafo@gmail.com. nung email asütsü akok.
Iba ya metenzükdangyongi tang tashi nung dokan aser restaurant 20-ibo register süogo, aser kobi melii par teloki Nagaland nung dokan aser stores sema senzütsü, aser iba mapang nung angati register süja angati online payment facility agütsütsü. Ano tejangrartemi parnok sasa User friendly website www.onlybafo.com nung register asütsü akok aser pei osang tejangja agutsütsü akok.
Iba website ya ita ka tsüngda junga inyaktsü imlar. Osang tejangja atema phone no. 8730867448 ajanga tongteprateptsü mesüra onlybafo@gmail.com. ajanga email asütsü akok. Iba dak alia Facebook page “onlybafo” ajanga tongteprateptsü akok.
Tanep DABA, Pastor Rev. N. Tzudir-i meshiteta sarasademtsü aser DABA Youth Director, Jongshimanen-i o tatsüka jembia liasü.