Nagaland nung Open Defecation Free (ODF) yimtsüng 246 lir

Kohima, September 25 (TYO): Nagaland nung Open Defecation Free (ODF) yimtsüng 246 lir aser state Public Health Engineering Department (PHED)-i March 2018 tashi nung state ajunga ODF kümdaktsütsü atema mapa inyaker.
Iba mapatong ya Swachh Bharat Mission (SBM) kübok inyaker, ta PHED Nagaland Chief Engineer, Er Kevisekho Kruse-i ashi.
Hokolbarnü Hotel Japfu nung Swachh Bharat Mission azüngashiba sentong ka agidang Er Kevisekho Kruse-i ashiba agi, Nagaland nung yimtsüng 1128 lir aser iba nungi 246 tashi ODF yimtsüngtem kümogo.
Yimtsüng 246 nung alirtemi pei kidang metsümeshidak yangluogo aser March 2018 tashi nung tanüngba yimtsüng ajak nung pei pei metsümeshidak yanglutsü, ta Er Kruse-isa ashi.
Swachh Bharat Mission kübok Nagaland Angh, P B Acharya-i brand ambassadors 9 shimogo aser parnoki iba mapa ya nübortem mapa kümdaktsütsü atema meranga inyakdar. Ajisüaka metsümeshidak tim alitsüba aser temang merükmejua ayuba indang tebilemtsüji state sorkar mesüra ambassadors-i dang masü saka NGOs aser yimten lennirtemia yariteptsüla, ta paisa ashi.
“Metsümeshidak yangluba ajanga nisung ka nem tajangzük aika agütsür aser talisa anema alitsü atema kanga tongtipang lir. Metsümeshidak timi aliba ajanga nübortem rongsenkettsüng tsütsü ajungketer” ta Er Kruse-isa ayongzük.
Swachh Bharat Mission kübok department-i Nagaland kübok district tem sendaktepba highway ajak nung pay & use toilets yanglutsü, ta paisa metetdaktsü.
SBM atema Nagaland Brand Ambassador, Supongmeren Jamir-ia o jembidang, Nagaland nung alirtem ajaki Department aser tesentaktep teloktem den yaritepa temerük India alizük tongdaktsütsü merangdang ta ayongzük.
“Sensosangertemi pei temeket, office, school aser shishilembadak merükmejua ayutsü yimya mesübara, alizüng metongtettsü” ta paisa ashi.
Supongmeren-isa yimtsüng ajak nung PHED aser Water and Sanitation (WATSAN) Committee nungertemi metsümeshiba aser merükmejuba indang tesayuba prokshitsüla ta ayongzük.
Tanü agiba sentong nung mendenji Water & Sanitation Support Organisation Director, Er KG Sumi liasü aser SE Kohima Circle, Er Y Tep-i anküp tepela o jembi.