Nagaland nung opposition ka

Tang ya Nagaland nung sen agi dang anünger masü saka opposition agia anünger. Aji oda, Naga nunger tarutsü lanur putu yanglutsü asoshibo sen agi anüngba dang nungibo tanü opposition agi anüngba yasa tamajungba asütsü. Talisa asen lima nung tatar senden nung opposition malibaji auer aser ashier kanga alidak kinüker aser mitkar kata mali sademsadema awazüdaktsüba amai lir. Tanü asen lima nung opposition agi anüngba tetezü tatar senden nung tatar 60 prongla ‘Ruling party’ nung adenba dang masü saka joko Nagaland nung tenteta aliba tongtibang lokti tentet kechaia government anema ola madoke saka parnokang government akümba political party nung kongsang ka amai dang kümogo. Nübortem asoshi ibajisa takoksa tuluba asütsü. Aji oda, Nagaland anüker mali, kari auyar aser kari iba mapaji nungiter aser tesüsabo külemi lemsaa achir ta aliba mapang ka Nagaland anghi iba ama ochimashi mapatem anema jashia metetdaktsüba mapaji Naga nunger Khristan-tem asoshi Hindu nunger kati sangoktsüba teimla osang ka asütsü. Nagaland tatar senden nung züngsem rokerprongla Khristan purtem dang lir aser government nung inyaker ketdangsertema kanga agi Khristan pur teimba lir. Ajisüaka, Khristan purtem rongnung yimsüsür aser ketdangsertemi nübortem dang memeim aser maochi ochimashi mapa inyakba ngua Hindu nunger angh kati kanga jashia metetdaktsübaji Naga nunger ajak asoshi taaktsüka saka tayongzükba tuluka asütsü. Aji oda, tanü Nagaland nung temenen tongpang tulutibaji ochimashiba lir. Iba tongpang nung tekümdangtsü aser tezüdangtsü tulutibaji yimsüsür aser ketdangsertem shirnoki nübortem meyong shilem miimzüka agir, parnokiang meyiper nübortem dang ochishia alitsü ajungshir aser item tajungshi otemji nübortemi nangnanga agir. Itemji lokti aser arogo sentong nung dena tongti tesemdanger asütsü jaoker, kechiyong parnok nung jagi auyazüka akaba sen nungi tenla terabo agütsütsü imlar aser atangjiba nung agütsür. Iba amaji ochimashiba sen medenibo lokti aser arogo sentong kata meinyaktettsüsa Naga nunger ochimashiba temenen  agi kangshia aliba mapang Nagaland angh-i  Nagaland government ya yamaibosa melinür saka tajungba kümner ta metetdaktsübaji Naga nunger nübortemi hau ta agizüktsüla. Nagaland nung yimsüsür, ketdangser aser contractor aser pa dena ochimashi inyaka lira, itemji jungkai adokdaktsütsüla aser tansütsü akatsüsa pua merenshitsüla ta angh-isa metetdaktsüba tejashi olaji tulu asütsü aser pai ashiba amaji meinyak tashi Nagaland meyanglushitettsü. Atangji, state nung government nung timtem mali tashibo angh ya tazütsü noksa amai ka dang lir, kechiyong state government-ji pai mulungba nung masü saka chief minister-i aniba government mulungba nung aotsü. Ajisüaka, angh-i state government nung kanga ochimashi inyakba mapatem puteta center nem metetdaktsüra iba jagi nübortem asoshibo tajangzük tuluka angutsü, kechiyong center nung itemji ashishiteptsüsa akümtsü. Atangji, Nagaland tatar senden nung o lemtepdakbo angh madener, saka tongtibang kaji tatar senden nung pai tama par government-i inyakba mapatem indang osang renemer arua metetdaktsütsü aser idakji ajemdaker tatartem o lemtep akatsü. Aji oda, taruba tatar senden nung angh-i jembiba mapangji tang pai government mapa nung temulung masü jashia jembiba ama jembitsü imlaa atadi. Yamajika mesüi, Nagaland angh-i dena kima yimdong aser lokti senden nung state government mapa nung temulung machiba indang jembili aser tatar senden nungbo state government kübok department shiai takok anguba idang jembili ta asünungbo, paa tebang ka nung tenmeli ana adenba nisung asütsü aser Naga nunger kanga akoksatsü. Iba amaji mesüi jembiba ama Nagaland tajungba küma yanglushitsü atema tanü pai jembia senzüba ama mapa agia inyaka sayutsüla. Atangji, Nagaland ajungtsü atemabo tang aliba governorba ya lia, taruba election magidang, “President’s Rule” mapang tatsükabosa alitsüla. Idangji dang asenoki P.B.Acharya ya shiba-ar metettsü.