Nagaland nung organic coffee tajung adokdaktsütettsü: Dr. Pieter

Kohima, March 30 (TYO): Land Resources Department, Nagaland den Coffee Board of India senteper 2019-2020 küm tashi nung state tesem ajaklen ali hectare 5000 nung coffee tsünütsü.
Tanü nikongdang Directorate nung osangbenertem den jembidang Director of Land Resources, Mhathung Yanthan-i, iba plantation ya state nung aliba district ajunga nung kibong 10000-i inyaktsü, ta ashi.
Kohima district nung timba tsünütsü; iba district nung kibong 1548-i hectare 774 nung tsünütsü, aser Kiphire o Longleng district na nung tajemba asütsü,  district ana shia nung kibong 690-i hectare 345 tsünütsü.
Iba mission ya 2015-16 küm tenzük, kong coffee sampling lakh 6 intetdaktsü aser district 7 nung kibong 450-i ali hectare 230 nung tsünü.
Coffee plantation atema kümshia telemsaji- 2016-17 küm ali hectare 917 nung, 2017-18 küm hectare 1190, 2018-19 küm hectare 1710 aser 2019-20 küm hectare 953 nung tsünütsü.
Mhathung-i ashiba agi, küm aika tejaklen  state-i coffee plantation tenzük, saka aluyimertemi shishilembateptsü tebilemtsü ajuruba ajanga anenatok.
Ajisüaka tang Coffee Board of India-i Department den senteper state nung coffee tsünüba ajungkettsütsü atema küm pongu sentong yangluogo.
Iba sentong dak sentakba nung state nung coffee lu ayimertem nem nüngdakba technical aser  marketing techniques tesayuba agütsütsü atema Department-i South Africa nungi coffee mongin, Dr. Pieter jaok.
Dr Pieter-i, department-i nüngdakba marketing sentong yangluogo, anungji pei nüngdak periba den külemi tangalenia yoktettsüsa state-i quality organic coffee adokdaktsütettsü, ta ashi.
Paisa, coffee lu ayimba ajanga nüburtem rongsenkettsüng jenjang tajungba akümtsü, ta ashi.
Atemzüka aliba ama hectare 5000 nung coffee lu ayimba ajanga Nagaland-i taruba küm pongu tsüngda coffee MT 8000 adokdaktsütettsü, ta Dr. Peiter-isa shisem.
Kohima, Wokha, Zunheboto aser Mokokchung district tem nung coffee plantation semdangba sülen Dr Pieter-i, cofeee lu ayimtsü atema state indang ali aser tsüngsang-mopungji tetemsü, aser alima nung cofeee adokdaktsür tongti rongnung Nagaland adentsüsa lir, ta metetdaktsü.