Nagaland nung osangbenertem asoshi ‘Welfare Fund’ tenzüktsü

Dimapur, Oct. 29 (TYO): Tang tashi nung Nagaland nung osangbenertem timtem lendong nung teyari angutsü asoshi state sorkari teyari lenmang tila kata lapokja mali, ajisüaka iba küm nungisa tenzüka osangbenertem asoshi “Journalists Welfare Fund” ka tenzüktsü sorkar telemtetba agiogo.
Yashi Kohima nung Nagaland Press Association purtemi Kohima nung Information & Public Relation (IPR), Parliamentary Secretary, Wb. Khekaho Assumi pa office nung ajurua iba nüngdak nenshia jembidang, pai iba sentong ya yaktasa tenzüktsütsü ta nangzük.
Tamalen Nagaland Press Association (NPA)-i asüngdangba ama, tang ya IPR department-i “Nagaland Journalist Welfare Fund” aser “Nagaland Press Accreditation Policy” teyangludak lir, aser item sentongtem nungji NPA teloki ashiba ama osangbenertem ajak ajangzüktsüsa inyaktsü department tangatetba lir.
Kodang osangbenertem asoshi iba teyari ya agütsü tenzükdir, iba jagi osangbenertem shilumanem agi atongdang, lendong timtem aser asüama ajuruba mapang senotsü teyari angutsü.
Iba teyari ya state nung “Accreditate” asür aser masür osangbenertem ajak asoshi alitsü aser iba teyari agütsütsü asoshi pa mesüra la ita sen mapitsü.
Yashi iba onük IPR Parliamentary Secretary den jembidang, IPR Additional Director, Wb.Limawati Longchar dena liasü.