Nagaland nung osangbenertem bendang lima sema jaja

Nagaland nungi  aor osangbenertem den  IPR  Parliamentary Secretary; Khekaho Assumi Macao nung tangokba noksa ka yangi angur. 

Dimapur, Oct. 12 (TYO) : Nagaland nung Information & Public Relations (IPR) Parliamentary Secretary, Khekaho Assumii anir osangbenertem aser IPR nung inyaker parnok nisung ter taoba hopta piyong South Asian linüktem kar sema jajar yakanü Deobar nü to meyipa shilangogo.
Parnok ya September 30 nü Nagaland nungi apuso aser Hongkong, Macao, Phuket aser Bangkok yimtitem semdanga yangji nüngdakba purtem ajurua shisalemsatepa liasü.
Hongkong nung IPR nung inyakertem aser osangbenertemi Hongkong Information Services Department nung inyakertem parnok mapa inyakdak Harbour building nung ajurua parnok inyakyim indang shisalemsatepa liasü. Hongkong Information Services nung Deputy Director, Brett Free-i ashiba agi, alima nung osangtsüsang yokba tesem tajungtibatem rongnung Hongkong Information Services center ya ka lir aser iba nungi anogo nung ghonda 24 Hongkong yimti aser alima ajungalen atalokba indang metetdaktsür.
Tanü putu nungbo Smart phone amshir teimba kümadoker asünungji, Hongkong Information Services Department-i social media ajanga osang prokshiba maparen tsütsü tongtibangba temulung agüja inyaker ta paisa ashi. Tanü putu nung nisungtem asoshi tekaratiba nung metetdaktsüba aser atongba osangtsüsang dang nüngdaker asünungji Hongkong Information Service ajanga osangtsüsang ajak tekaratiba nung agütsütsü meranger ta paisa metetdaktsü.
Nagaland nungi aor IPR nung inyakertem aser osangbenertemi parnok nem bendang lima nung inyakba mapatem nungi shisarenloka angazüktsü asoshi maongka agütsüba atema Parliamentary Secretary IPR, Khekaho Assumi aser Chief Minister na dang pelaba metetdaktsüogo.